Söngkonan Jessica Simpson gaf út endurminningar sínar á árinu og í bókinni, sem nefnist Open Book, fjallar hún kynferðisofbeldi sem hún mátti þola sem barn. Gerandinn var dóttir fjölskylduvinar sem hún deildi oft rúmi með og ofbeldið stóð yfir í nokkur ár. Í bókinni kemur fram að það flækti málið að umræddur gerandi hafi einnig verið þolandi kynferðisofbeldis frá hendi eldri manns og Jessica hafi því í aðra röndina vorkennt henni og í hina röndina haft óbeit á henni.
Jessica var í vikunni gestur í hlaðvarpi Katherine Schwarzenegger, Gift Of Forgiveness, þar sem hún ræddi atvikið og afleiðingar þess nánar. Hún greindi frá því að fyrir átta árum hafi hún ákveðið að ganga á konuna sem hún og gerði. „Ég fór til hennar og sagði, ég veit að þú veist hvað var á seyði og ég veit að þú varðst fyrir barðinu á kynferðisofbeldi,“ sagði Jessica við Katherine og bætti við, „Hann misnotaði hana og svo kom hún til mín og gerði það sama við mig og ég vorkenndi henni að svo mörgu leyti að ég leyfði þessu að gerast.“
Jessica kveðst hafa fyrirgefið konunni og tilkynnt henni það og bent henni á að leita sér hjálpar. „Ég sagði við hana, ég vil að þú vitir að ég fyrirgef þér en ég vil helst ekki vera aftur í kringum þig. Ég veit hvað gerðist á milli okkar og ég ætla ekki að lifa í afneitun með það. Ég sendi henni meira að segja eintak af bókinni minni og sagði henni að ég vonaðist til að það færði henni sátt.“
