Bandaríski körfuboltakappinn Kobe Bryant og þrettán ára dóttir hans, Gianna Maria Onore, létust í þyrluslysi í Calabasas í Bandaríkjunum á sunnudaginn síðastliðinn. Kobe var einn besti körfuboltamaður sögunnar og var 41 árs þegar hann lést. Heimurinn syrgir nú andlát hans. Alls fórust níu í slysinu.
Sjá einnig: Kobe Bryant látinn eftir þyrluslys
Kobe var á leið á körfuboltaæfingu hjá Mamba Academy þegar slysið varð. Hann var þjálfari körfuboltaliðs Gigi og voru nokkrir meðlimir liðsins um borð ásamt aðstoðarþjálfaranum.
Margir minnast Kobe með hjartnæmum hætti og kemur oft fram hversu mikið hann elskaði fjölskylduna sína. Í viðtali árið 2018 hjá Alex Rodriguez fyrir The Corp With A-Rod and Big Cat, útskýrði Kobe ástæðuna fyrir því að hann byrjaði að nota þyrlur til að ferðast frá heimili sínu í Orange County til Los Angeles til að sinna körfuboltanum.
„Umferðin varð virkilega slæm. Ég var í umferð og missti stundum af skólaleikritum því ég var í umferð,“ sagði hann.
„Þetta hélt áfram að versna og ég þurfti að finna leið til að geta æft og einblínt á körfuboltann, en samt ekki misst úr fjölskyldutíma. Þá fór ég að skoða þyrlur og hvernig ég gæti komið mér fram og til baka á 15 mínútum.“
Kobe vildi njóta hvers augnabliks með dætrum sínum.
„Ég nýti hvert tækifæri til að sjá þær og eyða tíma með þeim, þó svo að það séu 20 mínútur í bíl. Ég vil það,“ segir hann.
Kobe Bryant skilur eftir sig eiginkonu sína Vanessu og dæturnar Natalia Bryant, 17 ára, Bianka Bryant, 3 ára, og Capri Bryant, 7 mánaða.
