Svali hugðist kynnast landi og þjóð, koma sér fyrir og læra spænskuna, en nú er ljóst að hann mun hafa nóg fyrir stafni.
Ég er himinlifandi, fékk staðfest í dag að ég er kominn með vinnu á Tenerife. Mun semsagt fara að gera allt það sem mér finnst skemmtilegt og fá greitt fyrir það. Já, hreyfiferðir í boði fyrir viðskiptavini Vita.
Ég sem sagt fer strax af stað þegar út er komið í að finna hentugar hjóla- og hlaupaleiðir ásamt því að finna aðra skemmtun sem hentar flestum á Tenerife og munu Vita farþegar geta gengið að því vísu í vetur. Það örlar fyrir spenningi á heimilinu þessi misserin, því nú eru bara (þegar þetta er skrifað) 12 dagar í að við förum. Maður er búinn að pranga töskum inn á alla sem við þekkjum og eru á leiðinni til Tenerife um jólin. Sængurnar, íþróttafötin, sundskýlurnar og þetta helsta sem sagt komið í töskur.
Svo er reyndar annað verkefni sem kemur í ljós á næstu dögum sem gæti tekið við á nýju ári í viðbót við Vita verkefnið.
Hægt er að fylgjast með Svala á Tenerife á Snapchat: svalik og á blogginu hans.
