Ólöf Tara er einkaþjálfari sem þekkir matarkomplexa af eigin raun
„95 prósent af mínum viðskiptavinum eru með matarkomplexa.“ Þetta segir einkaþjálfarinn Ólöf Tara Harðardóttir sem þekkir frá fyrstu hendi hvernig það er að eiga í óheilbrigðu sambandi við mat. Þá segir Ólöf Tara að fólk sé með alltof óraunhæfar kröfur hvað varðar útlitsmarkmið. Hennar reynsla er sú að fæstir mæta í ræktina til að bæta heilsuna heldur sé markmiðið yfirleitt að líta betur út. Þá þykir henni undarlegt að horfa upp á hvað margir virðast vera í flækju með mataræðið. Hvað má borða og hvað ekki til að ná sem bestum árangri. „Þetta á ekki að vera flókið. Allur matur í góður í hófi. Þú þarft ekki að lifa á haframjöli og þurrum kjúklingabringum til að létta þig. Það er ekkert annað en leiðinleg mýta.“
Ólöf Tara hefur starfað sem einkaþjálfari síðan í janúar 2016. Hún hefur þó verið viðloðandi „bransann“ lengur Ólöf fékk aftur áhuga á líkamsrækt árið 2012 þegar hún byrjaði að vinna í afgreiðslunni hjá World Class. „Þá var ég 20 kílóum of þung. Sem krakki og unglingur var ég alltaf í fimleikum. Ég meiddist mikið og þurfi að hætta snemma. Ég mátt lítið hreyfa mig á tímabili og einfaldlega hætti því.”
Samhliða því að Ólöf smitaðist af áhuga vinnufélaga sinna á líkamsrækt byrjaði hún að æfa aftur. Stuttu síðar fór hún á námskeið þar sem hún lærði að vera hóptímakennari. Árið 2015 fór Ólöf svo í Keili þar sem hún lærði einkaþjálfun. Í upphafi árs 2016 byrjaði hún svo að þjálfa. „Ég hefði getað fengið kúnna miklu fyrr en fannst ég ekki tilbúin. Ég var ekki í heilbrigðu sambandi við mat og fannst ekki rétt að taka viðskiptavini á meðan ég væri sjálf að ströggla við að breyta hugarfarinu.“
Ólöf útskýrir að það að vera með „matarkomplexa” geti birst í mörgum myndum. Til dæmis að borða of mikið. Borða of lítið. Fá samviskubit yfir því að borða óhollt. Hræðast ákveðna tegund af fæðu og að fitna af því að borða hana. Mikla mataræðið fyrir sér og finnast maður þurfa að borða einfalda, og kolvetaskerta fæðu, í öll mál, til að ná árangri.
Í dag hefur Ólöf Tara unnið bug á sínum „matarkomplexum“ og reynir, eftir fremsta megni, að aðstoða sína kúnna. „Oft þegar ég fæ matardagbækur þá eru ummæli í sviga fyrir aftan þar sem kúnninn rífur sig niður fyrir að eitt að fá sér kökusneið eða Snickers. Það er auðvitað ekki í lagi. Þú skemmir ekkert vikuna með því að borða súkkulaði af og til. Það þarf miklu meira til svo það hafi áhrif á vigtina.”
Að hennar mati er stærsta vandamálið það að það eru svo margar reglur í gangi varðandi mataræði. „Staðreyndin er sú að ef þú borðar venjulegan mat þá færðu öll næringarefni sem líkaminn þarf úr fæðunni. Þetta er í alvörunni svona einfalt.“
Eitt af vandamálunum sem fólk stendur frammi fyrir í dag, og ýtir undir óraunhæf útlitstengd markmið, eru samfélagsmiðlar. „Maður dettur alveg í þennan pakka sjálfur þegar maður skoðar, til dæmis, fitness módel á Instagram. En þá er líka mikilvægt að átta sig á því að ef maður ætlar að vera með sixpack allt árið þá krefst það, fyrir flesta, gríðarlega mikil skipulags og tíma Margir eiga auðvelt með þetta en aðrir ekki. Maður á að einbeita sér að því að vera besta útgáfan af sjálfum sér í stað þess að vera stöðugt að miða sig við aðra.“
Ólöf Tara segir það nokkuð algengt að fólk komi til sín, fyrir sumarið, og segi að þar sem það sé að fara á ströndina þá langi því að létta sig og komast niður í ákveðna fituprósentu áður en fríið byrjar.
„Ég skil stundum ekki þessar kröfur. Hver segir að þú þurfir að vera 15 prósent fita til að eiga það skilið að fara í bikini og ef það tekst ekki þá rífur þú þig niður. Þetta er komið út í svo miklar öfgar. Fólk verður að átta sig á því að við erum jafn ólík og við erum mörg. Það sem skiptir mestu máli er að hreyfa sig til að öðlast betri líkamlega heilsu. Því miður eru fæstir með það markmið.“
Þá segir Ólöf að Íslendingar séu almennt ekki nógu vel upplýstir um næringafræði. „Auðvitað ætti fólki að vera boðin ókeypis ráðgjöf, þjálfun og fræðsla. Það ætlar sér enginn að verða feitur. Það að fræða fólk og leiðbeina því myndi kosta samfélagið miklu minna, þegar uppi er staðið, heldur en kostnaðurinn sem fylgir lífstílstengdum sjúkdómum. Þeir eru stórt vandamál á Íslandi í dag. Það varðar okkur öll þegar heilsa þjóðarinnar er slæm.“
Ólöf vill jafnfrétt leiðrétta þann misskilning að óhollur matur sé ódýrari heldur en hollari fæða. „Pizza getur kostað allt upp í 4000 krónur. Ég þekki mjög mikið af fólki sem borðar mikið af pizzu. Þú getur keypt mjög mikið af hollum mat fyrir þann pening, og átt afganga næstu daga á eftir. Það er stundum eins og fólk átti sig ekki á því.“
Það sem skiptir mestu máli til að ná árangri, að mati Ólafar, er að brjótast úr viðjum vanans. „Við erum bara ein stór venja og sækjum aftur og aftur í sama farið. Það er erfitt að breyta venjum og tekur miklu lengri tíma en fólk gerir sér grein fyrir. Fólk verður að gefa sér tíma, líka til að mistakast.“
