„Það er gaman að vera þekkt en á sama tíma getur það verið óþægilegt. Ég finn mikið fyrir því að fólk starir á mig,“ segir Sonja Rut Valdin sem sló rækilega í gegn með Áttunni þegar hún flutti lagið NeiNei. Hún var uppgötvuð á Snapchat og segir Sonja að eftir að frægðin bankaði á dyrnar geti hún ekki lengur gert allt sem hún vill. Það er því ekkert endilega sældarlíf sem fylgir því að vera þekktur á Íslandi. Í samtali við Vísi segir Sonja:

„Mig langar að vera kurteis og almennileg en staðreyndin er sú að börn og unglingar bíða í hópum fyrir utan heimili mitt, dingla bjöllunni og hringja í mig. Mér finnst erfitt að ýta börnum frá mér því þau eru svo hjartahrein og einlæg. Því reyni ég alltaf að taka þeim fagnandi og vera hress til að særa engan.“

Bætir Sonja við að fólk eigi erfitt með að átta sig á að hún sé manneskja sem hafi þörf fyrir að lifa sínu lífi í friði þegar hún er heima og sé ekki alltaf tilbúin til að spjalla við aðdáendur eða láta taka af sér myndir. Sonja segir einnig hafa lent í því að vera í bíl og ef fólk í næsta bíl sér hana eigi hún að skrúfa niður rúðuna, stoppa jafnvel og vera til í myndatöku og spjall. Hún kveðst þó sjálf skilja þennan spenning þegar um þekkta manneskju sé að ræða. Hún hafi upplifað það sama þegar hún hafi séð fyrir tilviljun frægar persónur sem hún hafi haldið upp á.

„Krakkar í dag eru líka svo ákveðnir og beinlínis segja manni að vera með þeim á mynd því að ég hafi valið að verða fræg. Fólk á mínum aldri hleypur líka á eftir mér, þegar ég fer út á lífið, ýmist til að hrósa mér eða gera lítið úr mér. Ég held að þeim líði eins og þau þekki mig. Ég er beðin um að gera eitthvað fyrir Snappið þeirra en vitaskuld vil ég það ekki alltaf því stundum vil ég eingöngu njóta lífsins með vinum mínum. Ég á mitt líf þótt ég sé orðin þekkt.“

Hér má lesa viðtalið í heild sinni og fyrir neðan myndbandið með Áttunni við lagið NEINEI.

[youtube https://www.youtube.com/watch?v=e4FC6cqSmuo&w=660&h=415]