Gunnar Smári Egilsson, fjölmiðlamaður og stofnandi Sósíalistaflokksins, og eiginkona hans, Alda Lóa Leifsdóttir, hafa sett glæsilegt einbýlishús sitt við Fáfnisnes 3 á sölu. Ásett verð er 125 milljónir króna, en þetta fallega hús, sem byggt var árið 1969, er 244 fermetrar.

Í sölulýsingu kemur fram að húsið hafi verið endurnýjað mikið að innan, en það var teiknað af Þorvaldi S. Þorvaldssyni arkitekt. Þá segir að húsið hafi verið kosið fegursta hús Reykjavíkur árið 1973, nokkrum árum eftir að það var byggt.

Á vef mbl.is kemur fram að Gunnar Smári og Alda Lóa hafi fest kaup á húsinu síðasta haust, en þá var það búið að vera í eigu tveggja aðila allt frá upphafi.

Í apríl var greint frá því að Gunnar Smári hygðist stofna Sósíalistaflokkinn, en áður hafði Gunnar starfað sem útgefandi Fréttatímans. Hann hætti störfum á blaðinu í byrjun aprílmánaðar. Flokkurinn var stofnaður 1. maí síðastliðinn en á vefsíðu flokksins segir:

„Sósíalistaflokkur Íslands er flokkur launafólks og allra þeirra sem búa við skort, ósýnileika og valdaleysi. Andstæðingar Sósíalistaflokks Íslands eru auðvaldið og þeir sem ganga erindi þess.“

Óhætt er að segja að húsið sem Gunnar Smári og eiginkona hans selja sé glæsilegt, en í því eru fimm svefnherbergi, tvær stofur og tvö baðherbergi. Þá er rúmgóður tvöfaldur bílskúr, 40 fermetra geymslurými undir húsinu og fallegur og gróinn garður.