Bandaríski tónlistarmaðurinn og athafnamaðurinn Jay-Z segist hafa orðið „óstjórnlega reiður“ eftir að hann var sakaður um kynferðisbrot í einkamáli fyrir rúmu ári.

Málinu var síðar vísað frá dómi en Jay-Z ræðir þetta í viðtali við tímaritið GQ þar sem hann segir reynsluna hafa tekið verulega á sig.

Jay-Z, sem er 56 ára, var sakaður um að hafa beitt 13 ára stúlku kynferðisofbeldi árið 2000, ásamt tónlistarmanninum Sean „Diddy“ Combs. Konan, sem naut nafnleyndar og var aðeins kölluð Jane Doe, hélt því fram að atvikið hefði átt sér stað í eftirpartýi MTV-verðlaunahátíðarinnar.

Málinu var vísað frá í febrúar í fyrra. Í kjölfarið höfðaði Jay-Z sjálfur mál á hendur konunni og lögmönnum hennar og sakaði þau meðal annars um meiðyrði.

Í viðtalinu sagði Jay-Z að málið hefði haft djúpstæð áhrif á sig.

„Þetta var erfitt. Mjög erfitt. Ég var niðurbrotinn,“ sagði hann og bætti við að hann hefði fundið fyrir mikilli reiði. „Allt þetta tók mikið á mig. Ég var reiður. Ég hef ekki verið svona reiður í langan tíma – óstjórnlega reiður. Þú leggur ekki svona ásakanir fram á einhvern nema vera algjörlega viss.“

Hann sagðist þó hafa verið sannfærður um að sannleikurinn myndi koma í ljós.

„Ég vissi að við myndum komast í gegnum þetta því það mikilvægasta var að þetta var ekki satt. Og sannleikurinn, þegar allt kemur til alls, sigrar alltaf.“