Samkvæmt erlendum miðlum hefur Bloom undanfarna mánuði verið að hitta svissnesku fyrirsætuna Luisu Laemmel. Bloom er 49 ára en Luisa 28 ára og er því 21 árs aldursmunur á parinu.
Bloom og Katy Perry eiga saman fimm ára dóttur, Daisy, en eins og fram hefur komið er Katy nú í sambandi með kanadíska stjórnmálamanninum Justin Trudeau.
Bloom og Laemmel vöktu nýlega athygli þegar þau eyddu nokkrum dögum saman í Sviss. Eru þau meðal annars sögð hafa gist í lúxussvítu á hinu virta Dolder Grand hóteli í Zürich, þar sem nóttin getur kostað allt að tvær milljónir króna. Á sama tíma sótti Bloom kynningarviðburð fyrir bílaframleiðandann Porsche.
Eftir dvölina í Zürich er talið að parið hafi eytt helgi á fimm stjörnu Bürgenstock-hótelinu við Luzerne-vatn. Í ferðinni er Bloom einnig sagður hafa hitt vini og fjölskyldu Laemmel.
Heimildarmaður sagði við breska blaðið The Sun að sambandið hefði þróast jafnt og þétt:
„Orlando og Luisa hafa verið að hittast í rólegheitum í nokkra mánuði. Þau eru farin að mynda litla fjölskyldueiningu og Orlando flaug meira að segja með púðluhundinn sinn, Biggie Smalls, í ferðina.“
Sama heimild bætti við að fjarlægðin á milli þeirra gæti þó sett strik í reikninginn. „Hann er með aðsetur í Los Angeles en hún í New York, svo þau eru ekki alltaf saman, en eru stöðugt í sambandi og það er greinilega neisti á milli þeirra.“
Luisa starfar sem fyrirsæta og hefur meðal annars setið fyrir hjá tískurisanum Calvin Klein.
