Í færslunni greinir Jóhannes frá því að þar sem hann er orðinn miðaldra hafi hann gaman af því að horfa á þætti á borð við Silfrið og Kastljós. Og þar sem kosningar eru á næsta leiti verði áhorfið hjá honum stífara. Það er hins vegar eitt sem fer reglulega mikið í taugarnar á honum eins og hann orðar skemmtilega í færslunni.
„Hljóðnemarnir sem eru notaðir í Silfrinu eru AÐ GERA MIG GEÐVEIKAN!!!“
Jóhannes birtir myndir máli sínu til stuðnings en hljóðnemarnir sem notaðir hafa verið upp á síðkastið eru á statífum og koma upp úr borðinu í gegnum rifu. Að hans mati er þetta langt því frá besta leiðin til að skila heim í stofu því sem fólk er að segja.
„Ég held að það sé nokkuð samþykkt í heimi hljóðvinnslu að svokallaðir hnappamækar séu langbestir í þetta,“ segir Jóhannes og taggar Bergstein Sigurðsson, einn af stjórnendum Silfursins, sem er einmitt með slíkan hljóðnema á einni myndinni.
„Í útsendingunni þar sem stjórnandinn er með slíkan hljóðnema en allir viðmælendur með þessi skrípi uppúr rifunni fyrir framan sig er áberandi munur á hljóðgæðum,“ segir hann og útskýrir svo hvers vegna þessir hljóðnemar fara svona í taugarnar á honum.
„Þessir hljóðnemar sem eru notaðir þarna uppúr rifunni nema svo mikið af óþægilegum hljóðum frá borðinu. Fólk leggur áherslu á orð sín með handahreyfingum og fiktar í blöðum og annað þarna á borðinu (Eðlilega). OG það skilar sér allt í gegnum téða hljóðnema. Það er endalaust af dynkjum og strokum sem koma úr hátölurunum mínum þegar ég er bara að reyna að hlusta á hreinar lygar frá stjórnmálamönnum.“
Jóhannes Haukur segir að við eftirgrennslan hafi hann komist að því að þessir hljóðnemar séu afleiðing vinnubragða úr Covid-heimsfaraldrinum. Hugsunin hafi líklega verið að þurfa ekki að vera í snertingu við fólk og því hafi verið talið best að gera þetta svona.
„EN ÞETTA ER VERRA HLJÓÐ!!!,“ segir hann með áherslu.
Á einni myndinni sem hann birtir, frá árinu 2019, eru allir með svokallaðan hnappamæk. Bendir hann á að heimsfaraldrinum sé lokið og kallar eftir því að RÚV taki upp fyrir vinnubrögð og setji hnappamæka á hvern og einn sem mætir í myndver til að tala í Silfrinu.
„Plís! Ég get ekki meir!!! Ég þakka þeim sem hlýddu. Góðar stundir. Fyrirvari: Kannski er þetta bara rugl í mér og ég er rugludallur. En ef svo er þá myndi ég þiggja skýringar.“
