Fasteignasalinn og vaxtaræktarkappinn Árni Björn Kristjánsson og eiginkona hans, Guðrún Ósk Maríasdóttir, matvælafræðingur og næringarþjálfari, eru í opnu sambandi og hafa prófað ýmislegt síðastliðið ár. Þar á meðal hafa þau verið í svokölluðu „throuple“ sambandi með annarri konu.

Þau ræða um málið í hlaðvarpsþættinum Taboo sem þau halda úti saman.

Árni segir að það hafi „gerst mjög hratt“ að þau byrjuðu í sambandi með konunni, sem er bandarísk, en það hafi byrjað á trekanti. „Og svo voru komnar miklar tilfinningar inn í þetta,“ segir hann.

„Þetta samband entist í nokkra mánuði og var ótrúleg fallegt og mjög næs, auðvitað voru erfið samtöl og erfiðar og stórar tilfinningar, en þetta var mjög fallegt á meðan því stóð. En einmitt… þriðja manneskja að koma inn í fjórtán ára langt samband, við eigum þrjú börn, þetta var bara mjög flókið,“ segir Árni.

Guðrún segir að þau hafi fundið að þetta væri ekki fyrir þau.

„Við vorum kannski ekki það lengi í þessu að fara að opinbera þetta og að tala um þetta við börnin,“ segir Árni, en segir að þau hafi hitt foreldra hennar og hún foreldra þeirra.

„Það voru ekkert endilega allir foreldrar okkar hrifnir af þessu, mishrifin. En við fórum til hennar og vorum yfir jólin hjá henni með foreldrum hennar og fjölskyldu og það var mjög áhugavert. Þetta var alveg komið á það stig.“

Kom með þeim á árshátíð

Árni er fasteignasali hjá Pálsson fasteignasölu. Það var árshátíð hjá fyrirtækinu í Barcelona í fyrra og langaði parinu að bjóða kærustunni með.

„Við mönuðum okkur upp í að tala við Palla og Hafdísi, eigendur fyrirtækisins: „Hérna… árshátíðin í Barcelona, má kærastan okkar koma með?“ Þau sögðu: „Já, ekkert mál, við breytum þessu í þriggja manna herbergi.“ Þau tóku geðveikt vel í þetta og hún kom með okkur út, það var mjög gaman, skemmtileg ferð.“

Hann segir að samstarfsmenn hans hafi tekið mjög vel í þetta. „En fullt af fólki sem var alveg: Hvað er í gangi núna?“

Alls konar tilfinningar

Árni og Guðrún upplifðu alls konar tilfinningar á meðan sambandinu stóð.

„Það sem mér fannst fallegast var hvernig maður sá hrifningu, væntumþykju og jafnvel ást í allar áttir,“ segir Guðrún.

Árni segir að um tíma hafi honum liðið eins og kóngi og það hafi verið gaman að upplifa fantasíuna um að vera með tveimur konum.

„En síðan var maður líka dreginn á jörðina, þetta var mikil vinna. Fleiri aðilar til að eiga erfið samtöl og fleiri vinklar,“ segir hann.

„Það sem við komumst að, held ég, var að okkar líf er kannski ekki alveg að leyfa þetta akkúrat núna,“ segir Guðrún.

Fylgdu Árna á Instagram hér, og Guðrúnu hér.