Leikararnir og vinirnir Billy Boyd og Dominic Monaghan, sem þekktastir eru fyrir hlutverk sín sem hobbitarnir Pippin og Merry í þríleik Hringadróttinssögu, hafa sameinast á ný til að kynna Billy og Dom Eat the World, ferða- og matarþáttaröð. Vinirnir hafa ferðast um heiminn og uppgötvað áhugaverðan mat á leiðinni. Þættina má horfa á á Amazon Prime.

Vinirnir segjast hafa verið ákafir að gera þáttaröð sem kannar heiminn og uppgötvar hvernig matur og drykkur geta gefið „raunverulega innsýn í stað, fólkið og menninguna“.

Í fyrsta þættinum heimsækja þeir vin sinn og meðleikara í Hringadróttinssögu Sir Ian McKellen á krá hans í London, The Grapes, við bakka Thamesárinnar, þar sem þeir rifja upp tímann sem þeir voru saman við tökur á Hringadróttinssögu: 

„Það vildi svo til að við vorum að skoða kráarmenningu London og það vildi svo til að Ian McKellen á krá. Hann sagði okkur hvers vegna hann endaði í þeim hluta London og hvað krár þýða fyrir Bretland.“

„Dom og ég vildum segja áhugaverðar og einlægar sögur í þáttunum, en jafnframt uppgötvuðum við frábær ráð og leyndarmál í matreiðslu til að miðla áfram. Við hittum svo marga frábæra einstaklinga og heyrðum sögur þeirra, allt frá systrunum sem héldu fjölskyldufyrirtækinu gangandi og bjuggu til blóðmör á Suðureyjum, til yndislegra hjóna og ljúffengs götumatar þeirra í Fukuoka í Japan. Að sjá mismunandi leiðir fólks til að búa til og borða mat og hvernig það skapar samfélag hefur verið svo ótrúlegt ævintýri, við getum ekki beðið eftir að fólk sjái þættina,“ segir Boyd.

Monaghan bætir við: „Við Billy höfum alltaf skoðað staði sem við höfum heimsótt í gegnum mat og einnig tekið hvern stað með í hlaðvörpunum okkar, sem virtist falla vel í kramið hjá hlustendum. Það fannst mér eins eðlilegt og það getur verið að byggja síðan á þessum hlaðvörpum og búa til sjónvarpsþætti þar sem við ferðumst um heiminn og smökkum á ljúffengum kræsingum. Tveir af uppáhalds hlutunum okkar að gera!“