Þegar átján keppnisleiðum af 28 er lokið í Mongol Derby, erfiðustu kappreiðum heims, þá er ævintýrakonan Anna Guðný Baldursdóttir í 19. sæti af þeim 45 keppendum sem hófu keppni. Um tíma var Anna Guðný komin upp í 11. sæti en óheppilegt víti frá dómurum kappreiðanna reyndist dýrkeypt.
Í afar stopulu sambandi við DV, enda er netsamband í óbyggðum Mongolíu ekki beysið, þá segist henni líða vel andlega og að mestu leyti líkamlega og hún sé ánægð með árangurinn hingað til og stefni á hærra sæti á lokakaflanum.
„Fyrstu tveir dagarnir voru eiginlega erfiðastir. Ég var óheppinn og fékk mjög erfiðan hest á fyrstu leiðinni sem hrekkti mig, hann prjónaði yfir sig og við duttum síðan bæði,“ segir Anna Guðný sem blessunarlega varð þó ekki undir hestinum. Sá óþekki lét ekki þar við sitja heldur ákvað eftir 10 kílómetra að nenna ekki meiru og ég þurfti þvílíkt að hafa fyrir því að koma honum í hús,“ segir Anna Guðný.
Hún segist hafa verið afar stirð og lúin eftir fyrstu tvo keppnisdagana og þá hafi hún glímt við svæsna húðertingu undan reiðbuxunum.
„Reiðbuxurnar sem ég er með eru eiginlega of heitar og anda ekki nógu vel. Ég vissi af því að þetta gæti orðið vandamál en það var hægara sagt en gert að finna reiðbuxur á Íslandi sem hentuðu. Flestar reiðbuxur sem við notum heima snúast um það að halda á þér hita, ekki hleypa honum út,“ segir Anna Guðný.
Annað mögulegt vandamál var næring á meðan keppninni stendur. Á meðan kappreiðunum um mongólskar óbyggðir stendur þurfa keppendur að redda sér sjálfir að borða hjá hirðingjum á leiðinni. Ekkert rými er til að taka mat með sér og því renndi Anna Guðný svolítið blint í sjóinn varðandi hvernig fæðan færi í hana. Það hefur komið henni skemmtilega á óvart að mongólski hirðingjamaturinn myndi sóma sér vel á norðlensku sveitaheimili, að minnsta kosti fyrr á árum.
„Ég fæ yfirleitt soðið brauð og kjötsúpu sem er ekki alls ekki ósvipuð þeirri íslensku. Svo drekk ég gerjaða hrossamjólk sem bragðast eiginlega eins og mysa og nóg af mjólkurtei,“ segir Anna Guðný. Svo hefur hún fengið soðbrauð í nesti frá gestgjöfum sínum sem hún maular á hestbaki á meðan keppni stendur.
Þrátt fyrir að Anna Guðný hafi verið á hestbaki frá blautu barnsbeini þá hefur hún aldrei keppt í kappreiðum og hvað þá gegn reyndu keppnisfólki. Hún komst hins vegar á gott skrið eftir erfiða byrjun og var komin upp í 11. sæti þegar ógæfan reið yfir – víti frá dómurum keppninnar.
Afar vel er fylgst með velferð hestanna og sérstaklega að þeir séu ekki keyrðir áfram. Á hverri stöð þar sem skipt er um hest er fylgst með hjartslætti þeirra og 30 mínútum síðar á hjartslátturinn að vera kominn niður í 56 slög.
Við komu á stöð 14, af 28, var hestur Önnu mældur og reyndist hann fljótlega vera kominn í 58 slög. Að 30 mínútum liðnum voru slögin hins vegar orðin 60. „Þetta var eiginlega algjör óheppni. Það gerist einstöku sinnum að hestarnir stressast upp á þessum stöðvum og það gerðist í mínu tilfelli,“ segir Anna Guðný.
Refsingin var sú að Anna Guðný fékk ekki að halda áfram þann daginn og þurfti að horfa á eftir keppinautum sínum ríða út á meðan hún sat eftir. Það þýddi að hún datt niður úr sæti 11 í sæti 23.
Anna Guðný er þó hvergi að baki dottinn (þetta er reyndar tæknilega lygi því okkar kona datt reyndar einu sinni) og ætlar að gefa allt í lokabaráttuna.
Hægt er að fylgjast með stöðu keppninnar hér.
Anna Guðný fjármagnaði ferðina að hluta í gegnum Karolina Fund og hafa viðtökurnar farið fram úr hennar björtustu vonum. Hún setti sér markmið að fjármagna helming ferðarinnar þar og hefur náð því markmiði sínu. Söfnunin heldur hins vegar áfram á meðan keppni.
