Sterkur orðrómur er nú um að Hollywood stjörnurnar Pamela Anderson og Liam Neeson séu að stinga saman nefjum. Léku þau nýlega saman í vinsælli gamanmynd.
Breska blaðið The Daily Mail greinir frá þessu.
„Ég elska hana út af lífinu. Það er frábært að vinna með henni. Ég get ekki hælt henni nóg,“ sagði hinn 73 ára gamli Norður Íri aðspurður um samstarfið með Pamelu Anderson í endurgerð af kvikmyndinni The Naked Gun. Neeson varð ekkill árið 2009 þegar eiginkona hans, leikkonan Natasha Richardson lést í skíðaslysi.
„Hún er ekki með stórt egó. Hún bara mætir og vinnur vinnuna,“ sagði Neeson. „Hún er fyndin og það er auðvelt að vinna með henni. Hún verður frábær í myndinni.“
Hin kanadíska Anderson er nokkuð yngri en Neeson, aðeins 58 ára gömul, en hefur verið gift fimm sinnum. Þekktustu eiginmenn hennar eru trymbillinn Tommy Lee og rapparinn Kid Rock. Hún hefur verið einhleyp síðan 2022 þegar hún og fimmti eiginmaður hennar Dan Hayhurst skildu.
Í viðtali fyrir The Naked Gun lýsti Anderson Neeson sem „auðmjúkum“ og „fullkomnum herramanni.“ „Hann dregur fram það besta í manni, með virðingu, umhyggju, dýpt og reynslu. Það var algjör heiður að fá að vinna með honum,“ sagði Anderson. „Hann horfði af alvöru á mig og vafði frakkanum sínum utan um mig þegar mér var kalt. Ég held að ég hafi eignast vin að eilífu í Liam og við fundum tengingu sem var raunveruleg og hann er mjög góður náungi. Hann er líka svolítið kjánalegur. Hann hagar sér eins og smástrákur stundum.“
Orðrómur var á tökustaðnum um að stjörnunnar tvær væru að draga sig saman. Meðal annars af því að Anderson skildi eftir smásökur, múffur og heimabakað súrdeigsbrauð í herberginu hans.
