Guðni Th. Jóhannesson, sagnfræðingur og fyrrum Forseti Íslands, mælir með Þorskasögu.
„Í kvöld fór ég á aldeilis frábæran söngleik, Þorskasögu. Þar er farið yfir sögu þorskastríðanna á skemmtilegan og fjörlegan máta. Höfundar söngleiksins höfðu samband við mig á sínum tíma og nú sá ég loksins hversu vel þeim tókst til – auk allra hinna sem að verkinu standa, leikurum og söngvurum á sviðinu og öllum hinum. Enn eru nokkrar sýningar eftir í Háskólabíói og ég hvet fólk til að mæta á þessa flottu sýningu. Takk fyrir mig!“
Það er hópurinn Aftur á móti sem stendur að söngleiknum. Höfundar eru Hafsteinn Níelsson og Ólíver Þorsteinsson, Hafsteinn sér einnig um leikstjórn og dramatúrg er Kristinn Óli (Króli) Haraldsson.
ÞORSKASAGA er splunkunýr söngleikur upp úr þorskastríðunum þar sem þorskarnir fá loksins að segja söguna.
Sigur Íslendinga í þorskastríðunum fer að eiga 50 ára afmæli. Að gefnu tilefni bjóða gellurnar UGGA, RÁK, SPORÐA, LÝSA og HROGNHILDUR íslendinga, unga sem aldna, velkomna á hafsbotninn. Þar og aðeins þar verður þessi mikilvæga saga gerð upp … með söng og stæl.
Sjáumst á sjó og áfram Ísland.
Leikkonur eru Gúa Margrét Bjarnadóttir, Hildur Kaldalóns Björnsdóttir, Katla Þórudóttir Njálsdóttir, Salka Gústafsdóttir og Sólbjört Sigurðardóttir.
