Ástralski arkitektinn Bianca Censori og rapparinn Kanye West eru hætt saman ef marka má frétt DailyMail þar sem segir að þau séu að fara að sækja formlega um skilnað og hafi nú þegar gert með sér samkomulag um fjárskipti.

Mun Bianca frá um 5 milljónir dala við skilnaðinn sem nemur um 732 milljónum króna. Þetta hefur DailyMail eftir heimildarmanni sem er sagður náinn rapparanum.

Censori mun nú dvelja á heimili þeirra hjóna í Los Angeles en ekki er vitað hvað Kanye heldur sig en undanfarna viku hefur hann birt vægast sagt undarlegar færslur á samfélagsmiðlum þar sem hann dásamar Hitler, segist vera nasisti og ítrekar hatur sitt gegn gyðingum.

Fyrir 11 dögum fór Grammy-verðlaunahátíðin fram og þar birtist Bianca klædd í gegnsæjan kjól. Flestum þótti ljóst að hún valdi klæðnaðinn ekki sjálf heldur var það maður hennar sem klæddi hana, sem hann hefur gengist við á samfélagsmiðlum ásamt því að taka fram að konur séu eign manna sinna sem þeir geti farið með eins og þeim sýnist.

Skiptar skoðanir eru á þessum gjörningi hjónanna en margir telja að Biancu hafi ekki liðið vel með þetta.

DailyMail hefur eftir heimildum að Kanye hafi skipulagt þessa uppákomu til að draga athyglina frá ásökunum um að hann hafi kynferðislega misnotað fyrrum aðstoðarkonu sína í partý á vegum rapparans Sean Diddy Combs. Combs er í gæsluvarðhaldi og bíður eftir að aðalmeðferð fari fram í sakamáli þar sem hann er meðal annars sakaður um mansal.

„Kanye hefur áhyggjur af því að þessi nýja kæri muni steypa honum niður á sama plan og Diddy er á og hann er búinn að vera að ráðfæra sig við lögfræðiteymið sitt. Hann er að fylgjast með því sem er að gerast með Diddy og sumir halda því fram að þetta hafi verið uppákoma sem átti að skyggja á þessar hrottalegu ásakanir.“