Jakob Reynir Jakobsson, veitingamaður, segir frá því hvernig fjölskylda hans lokaði á hann þegar hann var djúpt sokkinn í neyslu. Hann er nýjasti gestur Kiddu Svarfdal í hlaðvarpinu Fullorðins á Brotkast.

Jakob er sonur Jakobs H. Magnússonar, matreiðslumanns, sem er annar eigandi veitingastaðarins Hornið í miðbæ Reykjavíkur.

Jakob opnar sig um fíknivanda og bataferli í Fullorðins og segir frá því hvernig 28. október 2020 hafi verið fyrsti dagurinn sem hann hafi vaknað edrú, með engin efni í sér. Deginum áður hafði hann komið til Svíþjóðar til að gangast undir meðferð við áfengis- og fíknivanda.

Hrikalega sárt, en skildi það

Á þessum tímapunkti var Jakob kominn á mjög slæman stað, hann var í daglegri neyslu og fjölskyldan hafði lokað á hann.

„Þau lokuðu á mig stuttu áður, held það hafi verið í maí. Ég reyndi að harka af mér yfir sumarið, þá var ég farinn að nota kókaín daglega og drekka með því,“ segir hann og bætir við að hann hafi oft gengið niður Laugarveginn og niður að Hafnarstræti þar sem Hornið er.

„Ég gerði það til að horfa inn um gluggann og sjá fjölskylduna mína vinna,“ segir hann.

„En þau lokuðu á mig og það var vont, alveg hrikalega vont, en eftir á að hyggja þá átti ég það skilið. Ég var búinn að haga mér alveg viðbjóðslega. Ég var búinn að ræna fyrirtæki hans pabba, stela áfengi og peningum. Ég er bara ofboðslega þakklátur fyrir að ég fái að vinna þar [í dag], eftir allt sem ég hef gert.“

Brot úr þættinum má horfa á hér að neðan, til að horfa á þáttinn í heild sinni er hægt að kaupa áskrift á Brotkast.is.