Jack Osbourne, sonur Ozzy og Sharon Osbourne, opnar sig um augnablikið þegar hann komst að því að faðir hans væri látinn.

Jack greindi frá þessu í nýlegu myndbandi á YouTube. Hann sagði að manneskja sem hefur starfað fyrir fjölskyldu hans í 30 ár hafi bankað á hurðina heima hjá honum í Los Angeles klukkan 3:45 um morguninn og sagt honum sorgarfréttirnar.

„Þegar ég horfði út um gluggann og sá að þetta var hann vissi ég að eitthvað slæmt hafði gerst,“ sagði hann.

„Hann sagði mér að pabbi minn væri látinn.“

Jack sagði að þó að hann væri sorgmæddur þá þætti honum gott að vita að faðir hans væri ekki lengur veikur og verkjaður.

„Ég vildi óska þess að hann væri ennþá hérna, en hann átti erfitt og ég held að fólk sá það á síðustu Black Sabbath tónleikunum. En engum datt í hug að þetta myndi gerast jafn hratt og þetta gerðist.“