Eins og kunnugt er glímir Bruce Willis við framheilabilun (e. frontotemporal dementia, FTD) sem er sjaldgæft form heilabilunar. Rúm þrjú ár eru síðan greint var frá því að leikarinn, sem varð sjötugur fyrr á þessu ári, glímdi við sjúkdóminn.
Í færslu sinni gaf Rumer til kynna að faðir hennar ætti erfitt með minni og að tjá sig.
„Dagurinn í dag er erfiður. Ég finn djúpan sársauka í brjóstinu yfir því að geta ekki talað við þig og sagt þér frá öllu sem ég er að gera og hvað er að gerast í lífi mínu,“ skrifaði hún og hélt áfram:
„Að faðma þig og spyrja þig út í lífið, sögurnar þínar, erfiðleikana og árangurinn. Ég vildi að ég hefði spurt þig fleiri spurninga á meðan þú gast enn sagt mér frá öllu,“ sagði hún og birti myndir af þeim saman, bæði gamlar og nýjar.
„En ég veit að þú myndir ekki vilja að ég væri leið í dag, svo ég ætla að reyna að vera þakklát og minna sjálfa mig á hvað ég er heppin að þú sért pabbi minn og að þú sért enn hjá mér,“ bætti hún við. „Ég mun vera þakklát fyrir hverja einustu stund sem ég á með þér. Ég elska þig svo mikið, pabbi – gleðilegan feðradag,“ skrifaði hún enn fremur.
