Þeir voru að tala um hrútskýringar þegar eitt sérlega pínlegt atvik rifjaðist upp fyrir Þorsteini.
Hrútskýring er íslensk þýðing á enska hugtakinu „mansplaining“, sem vísar í grófum dráttum til þess þegar karlmaður útskýrir hluti fyrir konu á yfirlætislegan og lítillækkandi máta, gjarnan hluti sem konan veit þó meira um en karlmaðurinn.
„Þetta eru kannski sirka níu ár síðan þar sem að ég er í samtali við konu um […] verkalýðsmál og […] vinnumarkað og eitthvað og þetta tengdist einhverri kosningabaráttu og eitthvað og þarna er einhver kona og hún er svona, ég man ekki af hverju en ég fer að útskýra fyrir henni eitthvað,“ segir Þorsteinn.
Hann hafði á þeim tíma verið í stjórn starfsmannafélags Reykjavíkurborgar og starfað sem forstöðumaður félagsmiðstöðvar en hafi þó vitað lítið um þessi mál sem voru til umræðu.
„En talaði samt þannig við þessa konu. Ég talaði með yfirlætislegum hætti og svona af óþægilega miklu sjálfsöryggi án þess að eiga fyrir því innistæðu,“ segir hann hreinskilnislega.
Þorsteinn segist ekki vita hvort hann hafi verið að reyna að sanna eða sýna sig, en þetta hafi komið í bakið á honum.
„Hún segir eitthvað á móti og fer að tala um miklu flóknari hluti og ég svona: Úff, ó… Voðalega veit hún mikið um þetta. Já, já einmitt. Og ég var eitthvað pínulítill í mér,“ segir hann hlæjandi.
Hann komst þá að því að konan var framkvæmdastjóri Starfsgreinasambands Íslands, hún Drífa Snædal. Stuttu síðar varð hún forseti Alþýðusambands Íslands (ASÍ) og í dag er hún talskona Stígamóta.
Þorsteinn og Haukur velta fyrir sér hvað Þorsteinn þóttist eiginlega ætla að kenna Drífu, sem er algjör reynslubolti á þessu sviði. „Sorrí Drífa,“ segir hann.
View this post on Instagram
