Systurnar og listakonurnar Lilja og Ingibjörg Birgisdætur opna á morgun, laugardaginn 24. febrúar, sýninguna Hlutskipti í Þulu gallerí í Marshallhúsinu. Opnunarsýningin er frá kl. 17 – 19, en sýningin stendur til 31. mars. Sýningin er fyrsta sýningin sem systurnar halda saman.
Á Hlutskipti munu þær sýna handmálaðar ljósmyndir, vídjóverk og resin skúlptúra. Inntak sýningarinnar er tilgangsleysi hversdagsins og magn alls þess drasls sem safnast svo auðveldlega í kringum okkur. Hafa þær skapað blóm, táknmynd fegurðar, úr þessum hversdagslegu hlutum með þá spurningu að leiðarljósi: hvenær tapar hlutur gildi sínu og fegurð?
Hlutskipti
Allt okkar líf seljum við tíma okkar og orku til að geta sankað að okkur hlutum.
Og vissulega safnast þeir upp, þar til þeir eru faldir inn í skáp eða geymslu, gleymast og glata tilgangi. Heimili okkar blása út, belgjast út af hlutum sem fylgja okkur, eða hafa kannski alltaf verið þarna, stundum er erfitt að muna hvaðan þetta kom allt saman. Á endanum kemur óhjákvæmilega að því að við rúmum ekki lengur þetta fargan sem fylgir okkur. Þá er að sjálfsögðu kominn tími til að stækka við sig, vinna meira, þéna meira, þenjast út, til þess eins að ferja lokaða kassa úr einni myrkvaðri geymslu í aðra rúmbetri. Og þegar dagur er að ævikvöldi kominn fá börnin okkar það hlutskipti að fara í gegn um skápa, skúffur og hirslur. Velja hvaða arf þau vilja halda áfram að dröslast með milli sinna heima.