Í kvöld á viðburða staðnum Húrra við Tryggvagötu verður talið í öll helstu lög hljómsveitarinnar góðkunnu Foo Fighters.
Hljómsveit kvöldsins segir að ástæða þyki til að heiðra sveitina á þessum tímapunkti og minnast trommuleikara sveitarinnar Taylor Hawkins en hann féll frá um aldur fram nú fyrir ári síðan. Foo Fighters þekkja allir rokk unnendur enda ein vinsælasta sveitin í heiminum í dag. Hljómsveitin hefur komið nokkrum sinnum til landsins og leikið á tónleikum við frábærar undirtektir.
Fráfall Taylor Hawkins var mikið áfall enda dáður drengur sem brann fyrir tónlistina. Nýlega voru haldnir tveir risa minningartónleikar honum til heiðurs á Englandi og í Bandaríkjunum og nú er komið að litla Íslandi að minnast kappans með gleði í hjarta.
Dagskrá kvöldsins verður flutt af mikilli innlifun enda liðsmenn í hljómsveit kvöldsins miklir aðdáendur og engir aukvissar þegar kemur að flutningi á rokkmúsík enda reynsluboltar á hverju hljóðfæri. Flytjendur:
Einar Vilberg – Söngur / gítar
Franz Gunnarsson – Gítar / söngur
Skúli Gíslason – Trommur / söngur
Elvar Bragi Kristjónsson – Gítar / söngur
Hálfdán Árnason – Bassi / söngur
