Bandaríska sjónvarps- og útvarpsstjarnan Nick Cannon sagði í viðtali að fyrrverandi eiginkona hans og barnsmóðir hans, stórsöngkonan Mariah Carey, væri „ekki mennsk.“
Nick og Mariah voru gift frá 2008 til 2016. Þau eiga saman tvíburana Moroccan og Monroe, 11 ára. Sjónvarpsmaðurinn eignaðist tólfta barn sitt í desember.
Nick var á dögunum gestur í hlaðvarpsþættinum The Shade Room. Hann sagði að Mariah Carey hafi verið ástin í lífi hans.
„Ég var tólf ára gamall með myndir af Mariuh Carey á veggnum heima hjá mér, og það varð síðan eiginkona mín. Og svo er það sú staðreynd að hún er bara svalasta manneskja sem ég hef kynnst á ævi minni,“ sagði hann.
Nick Cannon er 42 ára og Mariah Carey er 53 ára.
Hann sagði að Mariah væri „best“ og að „hún er alltaf svo hamingjusöm, alltaf að gera eitthvað fyrir aðra.“
„Sama hvað er í gangi hjá henni þá er ég alveg: „Vá, manneskja getur bara verið svona og ekki hleypt neikvæðri orku inn í líf sitt.“ Og þegar ég komst að því hversu ótrúleg hún er… þessi kona er ekki mennsk. Hún er guðsgjöf,“ sagði Nick.
Hann sagði að hjónaband þeirra hafi verið ævintýri líkast og að hann vilji frekar hugsa um það þannig heldur en að reyna á það aftur og að það verði ekki eins.
„En ef ég myndi fá tækifærið til að fara til baka og að þetta yrði eins, þá myndi ég grípa það.“
