Athafnakonan og áhrifavaldurinn Heiðdís Rós Reynisdóttir stefnir á að komast á Forbes-listann yfir ríkasta fólk í heimi. Hún segir í viðtali við Fréttablaðið að hún sé með mikið viðskiptavit og lítur upp til Kim Kardashian og Paris Hilton
Heiðdís starfaði lengi sem förðunarfræðingur en sneri sér að öðru fyrir nokkrum árum. Hún er búsett í Miami þar sem hún rekur lúxusþjónustuna The Dutchess Life VIP.
Athafnakonan segir að fyrirtæki hennar sérhæfi sig í lúxusferðum fyrir fræga og ríka fólkið. Hún sér um bókanir á flottustu næturklúbbunum og veitingastöðum í Miami og útvegar viðskiptavinum sínum einnig aðgang að lúxus snekkjum, glæsibifreiðum og öryggisvörðum.
View this post on Instagram
Viðskiptavinir hennar – sem eru allir efnaðir að sögn Heiðdísar – koma alls staðar að úr heiminum en þeir helstu frá New York, Texas, Dubai og London.
Heiðdís tekur rúmlega 280 þúsund krónur í þjórfé fyrir þjónustu sína, eða tvö þúsund dollara.
Athafnakonan ætlar sér að ná langt og vill vera með útibú um heim allan.
„Ég er með mikið viðskiptavit og tel mig afar greinda og hæfileikaríka. Markmiðið mitt er að verða ein af fyrstu Íslendingunum til að komast á Forbes-listann,“ segir hún og bætir við að hún fái innblástur frá Kim Kardashian og Paris Hilton.
View this post on Instagram
Margt er fram undan hjá Heiðdísi en auk þess að ætla að leggja undir sig viðskiptaheiminn langar hana líka að skrifa bók og gefa út lag. „Ég elska að syngja og er mjög góð í því,“ segir hún.
Heiðdís heldur úti vinsælli Instagram-síðu og birti í janúar myndband þar sem hún leyfði fylgjendum að heyra „hráu rödd“ hennar og sagði að þetta væri aðeins byrjunin.
View this post on Instagram
Hægt er að lesa viðtalið við Heiðdísi á vef Fréttablaðsins.