„Fyrir um fjórum mánuðum var ég að fara í gegnum öryggishólfið mitt og ég fann nokkra handskrifaða miða frá honum sem voru svo yndislegir og fengu mig til að skilja hvers vegna ég varð ástfangin af honum,“ sagði bandaríska leikkonan, Dyan Cannon sem er orðin 86 ára, við Page Six í nýlegu viðtali.
Cannon var 28 ára þegar hún giftist kvikmyndatákninu Gary Grant, sem þá var 61 árs, árið 1965. Þau eignuðust dótturina Jennifer, árið 1966 og skildu tveimur árum síðar. Hjónabandið var stormasamt og var ítrekað fjallað um það í fjölmiðlum með sláandi fyrirsögnum sem voru Grant ekki í hag.
Cannon gaf endurminningar sínar út árið 2011, Dear Cary: My Life with Cary Grant, ogþar segir hún frá vandamálum sem hófust við upphaf sambands þeirra. Grant hafi gagnrýnt klæðaburð hennar og oft orðin stjórnlaus af reiði. „Ég vissi aldrei hvað myndi koma honum af stað næst, og þegar hann var ekki í vinnunni elti hann mig um húsið og taldi upp galla mína,“ skrifaði hún.
„Ég setti ekki glasamottu undir vatnsglasið mitt. Ég lagði bílnum mínum skakkt í innkeyrslunni. Ég átti ekki að vera svona vingjarnleg við póstmanninn vegna þess að hann gæti fengið rangar hugmyndir, eða við vinnukonuna vegna þess að það var gott að halda fjarlægð frá henni.“ Segir hún að Grant hafi einnig þrýst á hana að neyta LSD með sér.
Hún viðurkennir að hún hafi sleppt fjölmörgu úr bókinni.„Það sem var mjög krefjandi fyrir mig við skrifin var hvað ég á að segja og hvað ekki. Cary átti svo marga sem elskuðu hann og ég vildi ekki láta þau missa stjörnuljómann yfir honum, minn hvarf um stund, það er furðulegt að ég er aftur komin með hann.“
Ný stuttþáttaröð á Britbox, Archie, byggir á bók Cannon. Archie Leach er og bernska hans raunverulegt nafn Grant og er æska hans eins og úr bók eftir sjálfan Charles Dickens.
Hann ólst upp við mikla fátækt í Bristol á Englandi. Þegar Archie var níu ára lét faðir hans leggja móður hans inn á geðdeild og sagði Archie að hún væri látin. Hann var orðinn 31 árs þegar hann komst að því að hún var á lífi. Erfitt samband þeirra í æsku Archie og það að hann taldi móður sína hafa yfirgefið sig átti eftir að lita öll hans framtíðarsambönd. Archie breytti nafni sínu í Cary Grant árið 1941, hann lést árið 1986, 82 ára að aldri.
Jason Issacs, sem leikur eldri Grant í þáttaröðinni, sagði að í fyrstu hafi honum fundist fáránlegt að vera boðið hlutverkið. „Og svo las ég handritið og áttaði mig á því að það snýst ekki um Cary Grant. Þetta snýst um Archie Leach, þess vegna er það kallað „Archie“ … allt sem ég vissi um Cary Grant, sannleikurinn reyndist vera hið gagnstæða. Þættirnir fjalla um mynd af manneskju, sem fann mikla endurlausn og frið með því að verða foreldri. Hann lærði að hann myndi aldrei öðlast ástina sem hann missti í æsku, en hann gat veitt barninu sínu ást á þann hátt sem hann gat aldrei gefið fullorðnum af því að hann ýtti öllum frá sér áður en þeir myndu yfirgefa hann.“
Cannon tengir við þessa lýsingu á fyrrum eiginmanni sínum. „Mér finnst eins og það sem gerðist var að hann þurfti að yfirgefa okkur áður en við yfirgáfum hann eða ég yfirgaf hann, til að vera með yfirhöndina, því hann var alls ekki hamingjusamur,“ segir hún og segist hún vona að fólk muni elska Grant meira eftir að hafa horft á þættina.
„Við lítum á aðra og hugsum með okkur að þeir eigi svo frábært líf, en innra með viðkomandi geta verið ör, eins og hjá Grant sem átti erfiða fortíð. Og þau áhrif sem áföllin höfðu á hann, hafa áhrif á aðra.“
Þáttaröðin kemur einnig inn á sögusagnir um samkynhneigð Grant og að hann hafi átt í samband við leikarann og fyrrum meðleigjanda hans Randolph Scott. Sjálf segist Cannon aldrei hafa séð neinar vísbendingar um að þær sögusagnir eigi við rök að styðjast. „Ef þetta er satt, þá varð ég aldrei vitni að neinu. Grant var mér aldrei ótrúr. Framhjáhald var ekki vandamálið, karlmenn voru ekki vandamálið, við vorum vandamálið,“ segir Cannon sem segir fyrrum eiginmann sinn hafa verið einstakan. „Þegar hann gekk inn þá átti hann rýmið. Það var enginn eins og hann og mun aldrei verða.“
