Í dag eru þau bæði stórstjörnur, leikarinn Tom Hanks og söngkonan Cher, en Hanks rifjaði það nýlega upp þegar hann þjónaði Cher fyrir áratugum síðan. Á föstudaginn voru Hanks og Cher gestir í þættinum The Graham Norton Show ásamt leikurunum Juliu Roberts og Timothée Chalamet. 

„Ég hef unnið fyrir Cher. Ég var vaktmaður á Oakland Hilton hótelinu,“ sagði Hanks þegar hann rifjaði upp sögu þegar hann starfaði á hóteli á áttunda áratugnum. Undrandi „Nei!“ heyrðist frá Cher.

„Þú varst með einum af rokkeiginmönnum þínum, og við vorum með töskuna þína. Og svo fékk ég fyrirmæli: „Hey, farðu með töskuna upp í herbergið hennar Cher,“ svo ég gerði það. Ég bankaði á hurðina og lagði hana frá mér og þú komst út og sagðir: „Já, þetta er hún. Takk, krakki. Þannig að ég hef unnið fyrir Cher,“ sagði Hanks og sagði að sig minnti að þessi stuttu samskipti þeirra hafi átt sér stað einhvern tíma árið 1975 eða 1976.

Á þeim tíma var Cher í sambandi við Gregg Allman, söngvara Allman Brothers Band, sem hún giftist í júní 1975.

Í þættinum lofaði Hanks Cher, sem viðurkenndi sjálf í samtalinu að hún væri ekki mikill aðdáandi sjálfrar sín og horfi ekki á sínar eigin kvikmyndir eða hlustar á sína eigin tónlist. „Þú ert að missa af,“ sagði Hanks við hana. „Fullkomin kvikmynd, Mamma Mia! 2. Þegar þú syngur Fernando, fullkomnun!“

Chalamet og Roberts tóku undir hrósið og sögðu Moonstruck og Silkwood uppáhaldsmyndir sínar með Cher. Fór svo að Hanks stakk upp á hópferð í bíó. „Ég held að við ættum öll að fara og horfa á kvikmyndir Cher núna.“