Bandaríska leikkonan Shannen Doherty hefur barist hetjulega við krabbamein síðastliðin átta ár. Hún deilir hins vegar slæmum fréttum af veikindum sínum í forsíðuviðtali við tímaritið People.

Doherty, sem er hvað þekktust fyrir leik sinn í þáttunum Beverly Hills 90210, greindist með brjóstakrabbamein árið 2015. Árið 2019 greindist hún aftur með krabbamein og ekki löngu síðar hafði meinið dreift sér og var komið í heilann. Í viðtalinu við People greinir hún frá því að krabbameinið sé komið í beinin.

„Ég vil ekki deyja,“ segir leikkonan sem er 52 ára. Þó að staðan sé erfið segist Doherty ekki ætla að gefast upp. „Ég er ekki hætt að lifa, ég er ekki hætt að elska og ég er ekki hætt að skapa […] Ég hef þá tilfinningu að ég eigi enn eftir að upplifa mitt besta augnablik í lífinu,“ segir hún.

Í viðtalinu kemur hún inn á það að meira fjármagn þurfi til að finna lækningu gegn krabbameini. „Það er í rauninni algjört rugl að við séum ekki enn komin með lækningu,“ segir hún meðal annars.

Þá segist hún vera að byrja með nýtt hlaðvarp sem hefur fengið nafnið Let‘s be Clear, en í því ætlar hún að ræða um líf sitt, leiklistarferil, sambönd og baráttuna við krabbameinið. „Það er eins og fólk geri ráð fyrir því að maður geti ekki gengið, borðað eða unnið þegar maður er með krabbamein. En það er svo langt frá því að vera satt.“

Hægt er að lesa allt viðtalið við Doherty hér.