Reykjavíkurborg hefur sent frá sér tilkynningu um að Menningarnótt verður haldin laugardaginn 19. ágúst. Segir í tilkynningunni að hátíðin sé hápunktur sumarsins, þar sem fjölbreyttir viðburðir liti mannlífið í miðborginni frá morgni til kvölds.
Hátíðin sé fyrir alla borgarbúa og gesti sem vilja taka þátt í hátíðinni og skemmta sér. Í ár verði Reykjavíkurborg 237 ára og Menningarnótt 28 ára og báðar hafi þær dafnað og vaxið í áranna rás.
Dagskráin í ár er sögð sérstaklega fjölbreytt og menningarleg allt frá stórtónleikum, dans, vöfflukaffi og listsýningum.
Menningarnótt verður sett við hátíðlega athöfn á Kjarvalsstöðum kl. 12.00. Hljómsveitin Langi Seli og Skuggarnir muni leika af sinni alkunnu spilagleði og dansarar frá Happy Studio fá gesti út á dansgólfið með sér. Í kjölfarið mun Listasafn Reykjavíkur bjóða gestum inn á Kjarvalsstaði á sýningaropnun þar sem sýningin Myndlistin okkar verður opnuð formlega í vestursal safnsins. Sýningin er afrakstur kosningar þar sem fólki gafst tækifæri til þess að velja listaverk úr safneigninni. Boðið verður upp á fjölbreytta dagskrá á Listasafni Reykjavíkur og Borgarsögusafni og er ókeypis aðgangur.
Að venju er heiðursgesti boðið að taka þátt í Menningarnótt með skemmtidagskrá í Ráðhúsi Reykjavíkur. Heiðursgestur í ár er Vestmannaeyjabær í tilefni af því að um þessar mundir eru fimmtíu ár liðin frá lokum eldgossins í Heimaey. Eyjamenn ætla að halda uppi þjóðhátíðarstemningu í Tjarnarsalnum frá klukkan 13-17 og verða með hvítt tjald og bjóða upp á bakkelsi og tónlistardagskrá.
Eftir nokkurra ára hlé verður sú hefð endurvakin að nokkrir íbúar í Þingholtunum bjóða gestum og gangandi í vöfflur og kaffi á milli kl. 14:00 og 16:00 á Menningarnótt. Götubitinn verður í Hljómskálagarðinum þar sem 16 matarvagnar verða á staðnum og bjóða fjölbreytt úrval af réttum.
Tónaflóð Rásar 2 verður á Arnarhóli og Tónlistarveisla Bylgjunnar í Hljómskálagarðinum. Moment dansveisla DJ Margeirs verður á Klapparstíg að venju.
Menningarnótt lýkur klukkan 23.00 með flugeldasýningu sem fylgjast má með frá Arnarhóli og víðar.
Af öryggisástæðum verður miðborgin lokuð fyrir akandi umferð frá kl. 07.00 um morguninn og fram yfir miðnætti svo gangandi vegfarendur geti notið dagskrárinnar og eru gestir hvattir til að koma fótgangandi eða hjólandi í miðborgina eða með almenningssamgöngum. Allar nánari upplýsingar um áætlun strætó má finna á straeto.is
Strætóskutlur aka til og frá bílastæðum við Laugardalshöll um Borgartún að Hallgrímskirkju með viðkomu á Hlemmi frá kl. 07.30–01.00.
Í samráði við rafskútufyrirtækin verður aðeins hægt að leggja rafskútum á ákveðnum svæðum á hátíðarsvæði Menningarnætur.
Dagskrána má nálgast á menningarnott.is
