Útvarpsmaðurinn vinsæli, Máni Pétursson, hefur sagt skilið við Sýn, sem á og rekur meðal annars Stöð 2, Vísir.is og útvarpsstöðvarnir Bylgjuna, FM957 og X-ið. Greinir hann frá því í færslu á Facebook-síðu sinni að hann hafi lokið störfum formlega um síðustu mánaðarmót en sé með mörg járn í eldinum.
„Þetta hefur verið áhugavert ferðalag í rúm 25 ár. Oftast skemmtilegt,“ skrifar Máni í færslunni. Hann segist kveðja alla í mikilli vinsemd og kærleik og þakkar frábæru samstarfsfólki fyrir samstarfið. En nú taki ný verkefni við, meðal annars umboðsstörf fyrir ýmsa listamenn, markþjálfun, bókaskrif en þó verður hljóðneminn ekki langt undan.
Leiðindi verða í lágmarki
„Framtíðarplönin eru að sinna þessu litla Paxal fyrirtæki mínu og þeim frábæru artistum sem þar eru. Vera aðeins duglegri að markþjálfa og taka ekki 10 ár í að skrifa næstu bók. Til að svala fjölmiðlaþörfinni og þeirri bakteríu sem hún er ætla ég að sjálfsögðu að halda úti hlaðvarpinu mínu sem heitir einfaldlega Máni og er hægt að finna á tal.is og gerast áskrifandi.
Þar kemur hann Gunnar Sigurðarson og stjórnar einum þætti með mér og stundum ræði ég fótbolta og almennt bara eitthvað bull. Þetta er algerlega twitter frír þáttur. Þannig að leiðindi eru í lágmarki,“ skrifar Máni.
