Árið 1963 var sóknarpresturinn í Newby kirkjunni í Yorkshire á Bretlandi að taka myndir af kirkjuskipinu sem hann hafði alltaf dáðst að.

En þegar að presturinn framkallaði filmuna sá hann meira en hann átti von á. 

Á myndinni má sjá hálfgagnsæja veru á fyrsta þrepi altarisins. Samt sem áður gnæfir veran yfir altarið, klædd skósíðri svartri skikkju. Sé hæð verunnar reiknuð út er hún rúmlega 2,7 metrar á hæð.

Engar hendur er að sjá og eitthvað sem líkist hvítri grímu hylur andlitið, aðeins sjást tveir svartir hringir á augastað en hvorki nef né munnur. Veran horfir beint á myndavélina.

Allir töldu um gabb að ræða

Sér Lord skildi hvorki upp né niður enda þess handviss að hafa verið einn í kirkjunni þegar myndin var tekin. Kirkjan hafði heldur aldrei verið tengd við yfirnáttúrulega atburði á við draugagang.

Þegar að presturinn sýndi fólki myndina trúði honum varla nokkur maður og voru flestir á því að myndin væri gabb, tekin með tvöfaldri lýsingu. Einna erfiðast var þó að skýra hæð verunnar sem sumir sögðu þó einfaldlega standa uppi á kassa.

Talin ófölsuð

Guðsmaðurinn var ekki sáttur, kvaðst vera strangheiðarlegur maður og kæmi honum aldrei til hugar að standa að svona barnalegu plati. Myndin var á endanum send til ljósmyndasérfræðinga sem komust að þeirri niðurstöðu að myndin væri ósvikin.

Draugurinn í Newby kirkjunni varð á örskotsstund frægasta draugamynd heim og var lagt allt kapp á að finna út hver hann væri. Eða hefði verið kannski frekar.

Margir telja að um sé að ræða munk sem bjó í nálægu klaustri á 16. öld. Sögur segja að sá hafi verið holdsveikur og því hulið andlit sitt með hvítum klút.

Enn deilt

Fjöldi manna hefur hefur ráðist í að endurgera myndina, oftar en ekki með ágætis árangri. Svo virðist sem ekki þurfa mikla ljósmyndakunnáttu til að falsa myndina.

En á móti kemur að erfitt hefur reynst að finna ástæðu fyrir af hverju hinn hlédrægi prestur tók upp á ljósmyndafölsun á efri árum auk þess sem fjöldi sérfræðinga á sjöunda áratugnum sór fyrir réttmæti myndarinnar.

Enn eru líflegar deilur um málið, ekki síst á fjölmörgum spjallrásum internetsins.