Scott Disick er sagður vera kominn með nýja kærustu, 23 ára gamla raunveruleikastjörnu en hann sjálfur hefur getið sér gott orð í raunveruleikasjónvarpi og er hvað þekktastur fyrir að vera fyrrverandi kærasti og barnsfaðir Kourtney Kardashian úr Keeping Up With The Kardashians.
Síðan Scott og Kourtney hættu saman hefur hann verið í nokkrum samböndum, síðasta kærasta hans var tvítug, fyrirsætan Amelia Hamlin.
Sjá einnig: Tvítuga kærastan fékk nóg – Í sundur eftir að umdeildu einkaskilaboðin fóru í dreifingu
Nú er hann sagður vera að slá sér upp með Holly Scarfone, sem vakti mikla athygli í raunveruleikaþáttunum Too Hot To Handle á Netflix.
Sést hefur til parsins nokkrum sinnum og svo virtust þau staðfesta orðróminn á Instagram í gær. Holly birti mynd af sér á nærfötunum og skrifaði Scott við myndina: „Ætlarðu ekki að þakka mér fyrir myndina?“
Holly bætti þá við textann við myndina: „[Scott Disick] tók myndina.“
Þessi færsla er ekki það eina sem hefur vakið athygli en útlit Holly hefur verið talsvert á milli tannanna á fólki, þá aðallega vegna þess hversu lík hún er yngri systur Kourtney Kardashian, Kylie Jenner.