Glöggir áhorfendur þáttanna Stranger Things telja sig sjá glitta í fjöldamorðingjann Jeffrey Dahmer í fjórðu og nýjustu seríu þáttanna. Í þættinum er Max Mayfield, leikin af Sadie Sink, á skólalóð Hawkins Highschool en að baki henni má sjá ungan mann sem minnir óneitanlega afar mikið á mannætuna Dahmer á yngri árum.
@elodvdb Jeffrey Dahmer in Stranger Things ? 😱 #jeffreydahmer #strangerthings #foryou ♬ son original – elovdb
Fjöldamorðinginn Jeffrey Dahmer myrti 17 unga menn á tímabilinu frá 1978 til 1991. Viðurkenndi Dahmer að hafa snætt sum fórnarlömb sín. Hann var dæmdur til ævilangrar fangelsisvistar árið 1991 en var barinn til bana af meðfanga sínum árið eftir, 34 ára að aldri.
Hann hefur enn á ný vakið áhuga fólks eftir að Neflix gerði nýja þáttaseríu um morðingjann alræmda; Dahmer – Monster: The Jeffrey Dahmer Story
Þættirnir eru gríðarlega vinsælir um allan heim, einnig hér á landi, og þykir leikarinn Evan Peters sýna snilldartakta í hlutverki Dahmer.
Kenningin birtist fyrst á TikTok með meðfylgjandi myndbandi og hafa 2,2 milljónir manna horft á.
Netverjar skiptast í fylkingar.
Framleiðendur Stranger Things eru frægir fyrir að lauma alls kyns tilvísunum til níunda áratugsins inn í þættina en á móti kemur að tímalínan gengur ekki upp.
Eins og margir á TikTok benda á útskrifaðist Dahmer árið 1978 en fjórða sería Stranger Things þáttanna gerist aftur á móti árið 1986. Dahmer var þá 25 ára gamall.
Stranger Things gerist einnig í Indiana fylki en Dahmer gekk í skóla í Ohio fylki og bjó í Wisconsin fylki árið 1986.
Þrátt fyrir það eru ekki allir netverjar sannfærðir að um tilviljun sé að ræða, eitthvað meira hljóti að ligga að baki.
