Fyrir fáeinum dögum urðu þau merku tímamót í lífi Hildar Björnsdóttur, oddvita Sjálfstæðisflokksins í komandi borgarstjórnarkosningum, að hún var formlega útskrifuð úr krabbameinseftirliti. Fólk er ekki formlega útskrifað úr eftirlitinu nema það hafi verið við góða heilsu í fimm ár frá lokum meðferðar.

„Það var ekki sjálfgefið að þessum áfanga yrði náð – ég er ein af þeim heppnu – og ég þakka hvern einasta dag þau forréttindi að vera ennþá lifandi,“ segir Hildur í færslu sem hún birti á Facebook-síðu sinni í dag.

Í færslunni segist hún vona að sín saga geti verið einhverjum hvatning. „Sögur þeirra sem tapa baráttunni við krabbamein eru reglulega sagðar – en sjaldnar sögur þeirra sem sigra stríðið,“ segir hún. „Fyrir nokkrum árum barðist ég fyrir lífi mínu – með þrjú lítil börn undir sjö ára aldri – í dag sækist ég eftir að verða borgarstjóri Reykjavíkur. Það er nefnilega hægt að rísa upp af botninum og láta drauma sína rætast“

Hildur segist ekki hafa ætlað sér að fjalla sérstaklega um þessi tímamót sín en að þau hafi slysast inn í umræðuna í viðtali sem séra Vigfús Bjarni tók við hana á dögunum. Viðtalið birtist á YouTube-rásinni Hægri hliðin en hægt er að horfa á það í heild sinni í spilaranum hér fyrir neðan.