Bonnie Caldwell frá Nýja-Sjálandi var pirruð út í eiginmann sinn fyrir að svara ekki skilaboðum hennar á meðan hann var í ferðalagi með vinum sínum. Hún komst stuttu seinna að það var vegna þess að hann var látinn.
Bonnie er 26 ára ekkja og deildi sögu sinni á TikTok. Hún byrjaði á því að birta myndband þar sem hún reynir að slá á létta strengi. Í byrjun myndbandsins má sjá hana fúla á svip: „Ég að vera pirruð út í eiginmann minn sem var ekki að svara mér í strákaferð.“
Síðan færist myndbandið yfir á mynd af eiginmanni hennar: „Hann var dáinn.“
@bonniec17 I mean he could have at least given me a heads up 🙄 #darkhumour ♬ original sound – kooze
Myndbandið hefur vakið gríðarlega athygli og birti Bonnie annað myndband þar sem hún segir frá slysinu. NY Post greinir frá.
Eiginmaður Bonnie, Matt Caldwell, lést aðeins 25 ára gamall í hræðilegu slysi þann 8. ágúst 2021. Hann fór með vinum sínum á íþróttaleik í nágrannaborg og gistu á hóteli í eina nótt.
Bonnie sendi honum nokkur skilaboð um morguninn, meðal annars: „Ég elska þig“ og „Ég get ekki beðið eftir að sjá þig.“
„Hann svaraði ekki, sem mér fannst frekar skrýtið. En mér datt í hug að hann væri kannski bara þunnur,“ segir hún.
Nokkrar klukkustundir liðu og var Bonnie ekki enn búin að fá svar. Hún var þá byrjuð að hafa áhyggjur. „Ég var byrjuð að átta mig á því að eitthvað mikið væri að. Nokkrir klukkutímar liðu til viðbótar og síðan fékk ég skilaboð frá bróður Matt þar sem hann bað mig um að fara til þeirra samstundis, og ég hljóp út um dyrnar.“
Lögreglan var heima hjá bróður Matt og tilkynnti henni að eiginmaður hennar væri látinn.
Bonnie útskýrir að Matt lést í hræðilegu slysi, hann datt niður af mjög háum bakka (e. embankment) nálægt hótelinu.
„Hann áttaði sig ekki á brún bakkans og misreiknaði hversu hátt fallið var,“ segir hún og bætir við að Matt hefði látist samstundis og töldu rannsakendur slyssins að hann hefði verið utan við sig í símanum þar sem síminn hans fannst nálægt honum og enn myndband í gangi.
„Þetta var skelfilegt slys sem enginn okkar hefði getað komið í veg fyrir,“ segir hún.
Bonnie segir að þau hefðu bæði verið með svartan húmor og væri hún búin að nota húmorinn til að komast í gegnum síðastliðna átta mánuði.
