Móðir hefur verið kölluð „ógeðsleg“ og sökuð um að nota son sinn til að auka vinsældir sínar á samfélagsmiðlum.
Jordan Cheyenne er vinsæll áhrifavaldur á YouTube. Hún lokaði nýverið YouTube-rás sinni og Instagram-reikning sínum í kjölfar gagnrýni fyrir að láta níu ára son sinn stilla sér upp fyrir mynd á meðan hann grét.
Jordan býr í Kaliforníu ásamt fjölskyldu sinni. Hún hafði eignast um 500 þúsund fylgjendur á undanförnum átta árum. Hún leyfði áhorfendum að fylgjast með daglegu lífi sínu sem einstæðrar móður. En nú sætir hún harðri gagnrýni.
Nýjasta myndbandið ber titilinn „We are hearbroken.“ Jordan virðist hafa gleymt að klippa það til og birti hluta sem átti ekki að fara í loftið. Hegðun Jordan hefur verið kölluð „virkilega ógeðsleg“.
Í myndbandinu voru Jordan og sonur hennar Christian að útskýra hvernig hvolpur fjölskyldunnar hefði verið greindur með parvóveiru (CPV). Parvo hjá hundum er mjög smitandi og hugsanlega banvænn veirusjúkdómur.
Jordan gleymdi að klippa síðasta bút myndbandsins út og afhjúpaði sjálfa sig í leiðinni. Eftir að myndbandið er „búið“, en myndavélin enn í gangi, setur Jordan handlegginn utan um son sinn og sagði honum að koma nær sér o og sagði „láttu eins og þú sért að gráta“. Hann svaraði móður sinni: „Mamma, ég ER að gráta!“
Hún hreytir þá út úr sér: „Komdu nær!“ og segir honum hvar hann á að hafa hendurnar og hvernig hann á að stilla sér upp fyrir forsíðumynd (e. thumbnail) myndbandsins.
Áhorfendur voru fljótir að bregðast við og gagnrýndu Jordan harðlega. Þeim hreinlega hryllti við hegðun hennar. Hún eyddi myndbandinu í kjölfarið og hlóð því upp aftur á YouTube, þá búin að klippa út umræddan hluta. Hins vegar fór upprunalega myndbandið á dreifingu á Twitter.
this is so DISTURBING what is wrong with mom vloggers omfg pic.twitter.com/krUjM5Sfit
— elle woods ♿︎ 24 (@artangeIII) September 8, 2021
Það er óhætt að segja að myndbandið og hegðun Jordan hefur vakið gríðarlega athygli, svo mikla að hún hefur lokað YouTube og Instagram síðum sínum. Margir fjölmiðlar vestanhafs greina einnig frá málinu og hafa aðrar YouTube-stjörnur einnig vakið athygli á þessu og fordæmt hegðun hennar.
Jordan birti myndband þar sem hún baðst afsökunar, en eyddi því. Insider greinir frá.
Í því myndbandi sagðist hún hafa orðið fyrir gífurlegum vonbrigðum með sjálfa sig þegar hún horfði á upprunalega myndbandið.
„Ég vil láta ykkur vita að mér býður við mér sjálfri fyrir að hafa stillt mér upp fyrir forsíðumynd myndbandsins,“ sagði Jordan.
Hún sagðist átta sig á að hún þurfi að vera meira í „núinu“ og „ekki einu sinni hugsa um eitthvað svona þegar svona hlutir eru að gerast í lífi mínu.“
Jordan birti einnig myndir af sér grátandi á Instagram og sagðist hafa fengið morðhótanir og einkaskilaboð um son hennar sem „fara gjörsamlega yfir strikið“.
Það endaði með því að Jordan lokaði bæði YouTube og Instagram síðum sínum.
Daily Dot hafði samband við Jordan sem sagðist hafa lokað síðunum til að vernda heilsu og andlega líðan sonar síns.
„Mér býður við því sem ég gerði og ég hef enga afsökun. Þetta er hræðilegt. Ég elska son minn meira en allt og ég mun sjá eftir þessu augnabliki að eilífu. Ég ætla ekki í nein viðtöl eða eyða mörgum klukkutímum í að svara gagnrýni, það rétta í stöðunni er að fara alveg „offline“ og setja fjölskylduna í forgang,“ sagði hún.
