Lilja Karen Björnsdóttir hefur verið að æfa pole fitness, eða súlufimi, í rúmt ár með nokkrum pásum inn á milli. Yfir þann tíma hefur hún styrkst mikið og hún vildi deila árangri sínum með netverjum á TikTok.
Hún deildi tveimur myndböndum af sér gera sama hlutinn – klifra upp stöngina – en með árs millibili. Í fyrra myndbandinu er hún nýbyrjuð í pole fitness en í því seinna má sjá ótrúlegan árangur hennar enda vita þeir sem hafa reynt að gera það sama hversu erfitt það er.
@liljakaren97💪💪💪 ##pole ##polefitness ##plussize ##plussizepole ##poledancing ##plussizepolefitness ##polebeginner ##polefitnessbeginner ##strong♬ Aesthetic – Xilo
Viðbrögðin voru mestmegnis jákvæð en Lilja fékk mjög leiðinlega athugasemd frá karlmanni sem sagði henni að léttast „fyrir heilsuna.“
Lilja benti honum á að hún væri búin að fara fimm sinnum á æfingu þá vikuna og að heilsa hennar kæmi honum ekki við. Í samtali við DV segir Lilja að það sé ekki einsdæmi að hún fái slíka athugasemd.
„Ég fékk leiðinlega athugasemd við myndband þar sem ég var að gera „trick“ og datt svo og einhver kommentaði og sagði að þetta væri ástæðan fyrir því að það væru búnir að vera jarðskjálftar,“ segir Lilja Karen.
„Svo hef ég líka séð fullt af ljótum athugasemdum hjá öðrum „plus size“ stelpum í pole fitnes. Ég hef líka alveg fundið fyrir þessu annars staðar en á TikTok og öðrum samfélagsmiðlum.“
Lilja Karen tekur það fram að hún hefur aldrei orðið fyrir fitufordómum þar sem hún æfir pole fitness. „Allir eru rosa stuðningsríkir og það er bara alls konar fólk að æfa þar,“ segir hún.
Fela sig á bak við „áhyggjur“
Aðspurð hvort henni þykir fólk fela sig á bak við „heilsuáhyggjur“ þegar það er með fordóma svarar Lilja Karen játandi. „Já, ég sé þetta út um allt á samfélagsmiðlum. Feitt fólk má varla taka mynd af sér og deila henni án þess að fá ljótar athugasemdir. Það er það sem gerir fólk svona reitt, að sjá feita manneskju sem hatar ekki sig sjálfa,“ segir hún.
„Held að þetta með heilsuna sé bara afsökun til að vera ömurlegur. Það er fullt af hlutum sem fólk gerir sem er óheilbrigt en ég sé aldrei þessa sömu einstaklinga hafa svona miklar áhyggjur af heilsu reykingarfólks til dæmis. Og líka að skrifa svona athugasemd við myndband af manneskju hreyfa sig og sýna árangurinn, ég á bara ekki orð, sko. Leyfið fólki bara að lifa sínu lífi. Heilsa ókunnugra kemur þér ekki við.“
Lilja Karen ætlar að halda áfram að deila myndböndum á samfélagsmiðlum. „Ég mun ekki láta eitthvað svona hafa áhrif á mig og mun halda áfram að deila myndböndum,“ segir hún ákveðin.
„Jákvæðu athugasemdirnar sem ég fæ eru mikið fleiri og alltaf gaman að lesa þær.“
