Þetta er búið á milli Khloé Kardashian og Tristan Thompson. Aftur.

Parið tók saman á ný í lok árs 2020 en nú hefur enn annar framhjáhaldsskandallinn komið upp.

Það vakti mikla athygli þegar Tristan hélt fyrst framhjá Khloé snemma árs 2018. Khloé var þá langt gengin með þeirra fyrsta barn og var Tristan hótað lífláti og sagður hataðasti maður Bandaríkjanna. En Khloé endaði með að fyrirgefa honum á sínum tíma. En tíu mánuðum seinna hélt hann aftur framhjá henni og í þetta skipti voru svikin enn verri þar sem Tristan hélt framhjá með Jordyn Woods, þáverandi bestu vinkonu Kylie Jenner, litlu systur Khloé.

Sjá einnig: Kylie Jenner niðurbrotin vegna framhjáhalds Tristan: Hélt framhjá með fjölskylduvin

Khloé hætti með Tristan í febrúar 2019 en þau byrjuðu að stinga saman nefjum á ný í lok árs 2020.

En sagan hefur endurtekið sig enn á ný. Samkvæmt slúðurmiðlum vestanhafs hélt Tristan framhjá Khloé í afmælisveislu á föstudaginn síðastliðinn með þremur konum.

Heimildarmaður E! News segir að Tristan hefði mætt í partýið og sést hafi verið til hans fara inn í herbergi með þremur konum. „Hann virtist vera í geggjuðu stuði og vildi djamma. Hann var að drekka og djamma fram undir morgunn,“ segir heimildarmaðurinn.

Annað vitni segir að Tristan hefði sagst allt kvöldið vera einhleypur.

Hvorugt þeirra hefur tjáð sig opinberlega um málið.