Ung kona fékk nóg af því að þurfa að berjast fyrir athygli bestu vinkonu sinnar og ákvað að kenna henni lexíu. Hún sigldi undir fölsku flaggi át netinu og þóttist vera karlmaður. Hún vingaðist við vinkonu sína undir þvi yfirskyni að hún væri þessi karlmaður og gekk svo langt að eiga í árslöngu ástarsambandi við vinkonuna á netinu áður en sannleikurinn kom í ljós. Fjallað er um mál vinkvennanna í nýjasta þætti Catfish UK.
Tískuneminn Tasheeka, 22 ára, frá Leeds í Bretlandi, kynntist fyrirsætunni „Aaron“ á netinu fyrir tveimur árum. Hún varð ástfangin og vildi ólm hitta hann en ári eftir að þau kynntust lét hann sig skyndilega hverfa. Hún varð miður sín og gekk í gegnum ástarsorg.
Skyndilega hafði hann aftur samband við hana og þau tóku upp þráðinn að nýju. En þá var það besta vinkona hennar Sunisa, sem þóttist vera Aaron.
Tasheeka fékk framleiðendur Catfish UK á sjónvarpsstöðinni MTV til að hjálpa sér að finna Aaron. Hana var byrjað að gruna að ekki væri allt með felldu.
Þáttastjórnendum tókst að finna manninn á myndunum sem Sunisa notaði. Maðurinn heitir Glenn og sagðist aldrei nokkurn tímann hafa talað svo mikið sem eitt orð við Tasheeku.
Þá kom í ljós að það var Sunisa sem stóð að baki þessum „Aaron“ og ástæðan fyrir því var forgangsröðun Tasheeku, Sunisa var orðin langþreytt á því að vinkona hennar væri sífellt að velja karlmenn fram yfir hana.
Tasheeka sagði þáttstjórnendum Catfish UK að Aaron væri „fullkominn“ og að henni hafi „aldrei liðið svona gagnvart einhverjum áður.“ Þegar leið á þáttinn kom í ljós að fyrirsætan Aaron er ekki til. Tasheeka lenti í því að verða tvisvar sinnum fyrir „catfish“, en framleiðendur gátu ekki fundið út hver hafi verið fyrsta manneskjan til að sigla undir fölsku flaggi sem Aaron.
Sunisa sagði að hún vildi veita Tasheeku sálaró þar sem hún var svo miður sín eftir að Aaron hvarf skyndilega en viðurkenndi að það hafi gengið of langt.
„Ég hef verið Aaron síðan sá fyrri hvarf, síðan hann hætti að tala við Tasheeku hef ég þóst vera hann,“ sagði Sunisa við Tasheeku og þáttastjórnendur Catfish UK.
Tasheeka brást illa við tíðindunum og þurfti að fara afsíðis til að róa sig. „Hún veit að ég hef gengið í gegnum svo mikinn skít í gegnum ævina. Hún á að vera ein af bestu vinkonum mínum,“ sagði hún.
Sunisa sagðist hafa gert þetta til að „hjálpa“ Tasheeku, þar sem hún hafi verið svo sorgmædd eftir að Aaron fyrst hvarf. Hún sakaði Tasheeku einnig um að „hafa ýtt mér í burtu“.
„Ég sendi henni skilaboð en hún svaraði mér aldrei, ég hringdi en hún svaraði ekki. Ég meira að segja bauð henni hingað og þangað en hún neitaði alltaf, hún valdi alltaf Aaron fram yfir mig.“
Tasheeka brotnaði niður: „Ég vil ekki virðast vera hálfviti. Ég vildi bara vera hamingjusöm.“
Allt er gott sem endar vel og fyrirgaf Tasheeka vinkonu sinni og sagði að allir ættu skilið annað tækifæri.
