Parið Jenna, 21 árs, og Lorenzo, 30 ára, gefa orðinu „hvolpaást“ nýja merkingu.

Þau koma fram í nýlegum þætti frá vefmiðlinum Truly. Undanfarið hefur parið verið að vekja gífurlega athygli á samfélagsmiðlum, sérstaklega TikTok, fyrir „hvolpa“ myndbönd þar sem má sjá Jennu drekka úr skál á gólfinu, hlaupa á eftir bolta eða naga inniskó Lorenzo.

Jenna og Lorenzo láta ekki álit annarra koma í veg fyrir hvolpaástina og fara reglulega á hundasvæði og út að ganga, allan tíman lætur Jenna eins og hundur. Þau viðurkenna að það getur þó verið leiðinlegt að fá ljótar athugasemdir.

Jenna segir að hún hafi elskað að láta eins og hundur síðan hún var barn og elskar að vera í „hugarheimi hvolps.“

„Ég fer aldrei neitt án þess að vera með hálsólina mína,“ segir hún. „Þannig líður mér best.“

Jenna segist ekki vera að gera þetta fyrir athygli. „Þó svo að enginn myndi vita hvað ég heiti, þá myndi ég samt gera þetta.“

Jenna kynntist núverandi „eiganda“ sínum, eins og hún kallar hann, í fyrra. Þau hafa verið óaðskiljanleg síðan en samband þeirra hefur ekki fallið vel í kramið hjá mörgum netverjum. Þau láta það hins vegar ekki stoppa sig og ætlar Jenna sér ekki að breyta lífsstíl sínum til að þóknast öðrum.

„Ég myndi segja að Lorenzo sé besti eigandi sem ég gæti hugsað mér. Hann hugsar um mig, mér finnst ég vera heppnasti hvolpur í heimi,“ segir hún.

Horfðu á myndbandið hér að neðan.