Emma Watson sem flest allir þekkja úr Harry Potter myndunum sem Hermoine Granger, hefur tilkynnt að hún ætli ekki að taka að sér leikhlutverk á næstunni. Hún hefur verið í leiklistarbransanum seinustu 20 ár eða síðan hún var 10 ára gömul. Daily Mail greinir frá.

Talið er að hún ætli að eyða meiri tíma með kærastanum sínum, Leo Robinson, en þau hafa verið saman síðustu 18 mánuði. Hún sást á flugvelli í Los Angeles fyrr í mánuðinum með hring á baugfingri og var þá talið að þau hefðu trúlofað sig en hvorugt þeirra hefur tjáð sig um það mál. Heimildarmaður Daily Mail segir parið mögulega vera að huga að barnseignum.

Robinson hefur grætt fúlgu fjár á sölu kannabis í Kaliforníu-fylki en kannabis er löglegt þar. Seinasta kvikmynd Emmu Watson var Óskarsverðlaunamyndin Little Women í leikstjórn Greta Gerwig.