Eitt það versta sem getur komið fyrir þig í flugi er að sitja fyrir framan einhvern sem sparkar sífellt í sætið þitt, sérstaklega ef farþeginn sparkar um leið og þú ert að sofna.
Ferðablaðamaðurinn John Burfitt telur sig hafa fundið lausn við þessu vandamáli, en hún gæti mögulega komið mörgum á óvart. John hefur ferðast um víða veröld og fer oft í tímafrekar og langar flugferðir. Hann telur best að sitja í versta mögulega sætinu. Frá þessu greinir hann í pistli á escape.com.au.
John reynir yfirleitt að velja sér sæti alveg aftast í vélinni, upp við salernin, og hann vill helst fá gluggasæti. Hann segir ástæðuna vera að þá muni aldrei neinn sparka aftan í sætið sitt eða rekast í sig, auk þess geti hann hvílt höfuð sitt úti í horni.
Ekki nóg með það, einn helsti kosturinn er enn ónefndur. John segir að sætin alveg aftast séu þau sem séu oftast óbókuð og því komi oft fyrir að maður fái heilu sætaröðina út á fyrir sig. Það finnst John æðislegt, en þá getur hann lagst út af.
Þá bendir hann á enn einn kostinn, að barnafólk sé oft sett í fremstu sætin þar sem er mikið fótapláss og því verði hann fyrir minna aðkasti frá börnum.
