Það þekkja allir fólkið sem erfiðast er að gefa gjafir en það er fólkið sem á allt. Svanhildur Hólm Valsdóttir, lögfræðingur og framkvæmdastjóri Viðskiptaráðs, segir að eiginmaður sinn, fjölmiðlamaðurinn Logi Bergmann, sé í þessum hópi sem allt á og veit aldrei hvað hann vill í gjafir.
Svanhildur ræddi um það erfiða verkefni að finna gjöf handa eiginmanni sínum í Síðdegisþættinum á K100, útvarpsþætti Loga og Sigga Gunnars á, en Logi átti afmæli í gær, þann 2. desember.
„Eins og það sé ekki nógu ógeðslega ósanngjarnt að eiga bæði afmæli og hafa jól þá þurfi það að gerast í sama mánuðinum hjá þessum manni sem á allt og kaupir sér allt sjálfur ef hann langar í eitthvað og er svo líka bara óþægilega nægjusamur,“ segir Svanhildur og lýsir því svo hvað hún gerði til að finna réttu gjöfina.
„Ég fór í gær og mátaði sex týpur af koddum,“ segir hún og bætir við að það hefði einhver átt að taka hana upp í þessu verkefni sínu. „Þetta var svo ógeðslega asnalegt.“
Svanhildur var liggjandi uppi í rúmi á eins dýnu og hún og Logi eru með heima hjá sér. Að hennar sögn var það til þess að gera „vísindalega úttekt“ á því hvernig koddarnir hentuðu með eins dýnu og þau eiga.
„Svo endaði ég á að kaupa svona heilsukodda af því að hann er svona heilsukoddaperri og er alltaf að kvarta undan bakinu á sér og hálsinum og eitthvað.“
Svanhildur segir þá að Logi brölti yfirleitt mikið á nóttunni en þessi nýji koddi náði að koma í veg fyrir það í nótti. „Hann vakti mig aldrei í nótt,“ segir hún.
