Ekki er öll vitleysan eins, er stundum sagt. Alveg ótengt því þá ákvað karlmaður í Kaliforníu-ríki Bandaríkjanna að lögsækja miðil fyrir svik. Miðillinn hafði víst ranglega haldið því fram að hún gæti afnumið bölvun sem fyrrverandi kærasta mannsins lagði á hann. Fyrir þetta rukkaði miðillinn hóflegar 668 þúsund krónur.
Mauro Restrepo leitaði því logandi ljósi eftir einhverjum sem gæti aðstoðað hann með hjónaband sitt. Hann gerði því Google-leit að miðlum þann 17. september síðast liðinn. Í gegnum leitina fann hann Sophiu Adams og ákvað að leita til hennar enda kom fram á á síðu hennar að hún væri með doktorsgráðu í markþjálfun.
„Þetta jók traust kæranda á því að hann væri að tala við fagaðila sem gæti aðstoðað hann,“ segir í kærunni sem var lögð fram í dómi á föstudaginn.
Hins vegar kom á daginn að Sophiu þessari var greinilega ekki treystandi þar sem þjónusta hennar bjargaði ekki hjónabandi Mauros. Hann krefst þess því að fá greiddar rúmlega þrjár milljónir í miskabætur frá miðlinum.
Sophia Adams framkvæmdi Tarot-lestur fyrir Mauro og sagði honum þar að hann væri haldinn ólukku. Sophia héld því fram að fyrrverandi kærasta Mauro hefði leitað til nornar og lagt á hann bölvun. Það væri vegna bölvunarinnar sem Mauro væri óhamingjusamur, enda myndi hann og fjölskyldan öll lifa við óhamingju og stöðuga hættu á meðan bölvunin hvíldi á þeim. Ef bölvunin myndi hvíla á þeim áfram myndi það eyðileggja líf Mauros, barna hans sem og hjónaband hans.
Hins vegar bauðst Sophia til að aflétta bölvuninni fyrir litlar 668 þúsund krónur. Hann féllst á það og greiddi strax 131 þúsund krónur til miðilsins og rest myndi hann greiða að verkinu loknu.
„Þrátt fyrir loforð hjálpaði hún hjónabandinu ekki neitt,“ segir í kærunni. Þar kemur einnig fram að vegna ofangreinds glími Mauro nú við angist og kvíða og geti varla sofið.
Er því haldið fram í kærunni að Sophia noti starfsemi sína til að skaða aðra og misnota trú þeirra og traust.
