Undanfarna daga hefur Margrét Aradóttir verið að mála eldhúsinnréttinguna í sumarbústaðnum sínum. Hún segir að sér líður eins og hún hafi fengið nýja innréttingu og hafi aðeins þurft að greiða nokkra þúsund kalla fyrir.

Hún deildi „fyrir og eftir“ myndum í Facebook-hópinn Skreytum hús og hefur færslan vakið mikla athygli. Í samtali við DV fer Margrét yfir hvað hún gerði til að breyta eldhúsinu á einfaldan og ódýran máta.

Innréttingin er gömul eikarinnrétting sem var áður í eldhúsinu hjá mágkonu Margrétar.

„Ég byrjaði á að þrífa vel alla fitu og óhreinindi og pússaði svo létt yfir allt saman. Síðan grunnaði ég með Helmi grunn frá Slippfélaginu og málaði tvær umferðir með Intact 8 sem er með 8% gljáa, einnig frá Slippfélaginu,“ segir Margrét.

„Glerskápurinn er ekki hluti af gömlu innréttingunni heldur furuskápur sem var í bústaðnum þegar við keyptum hann. Ég ákvað að hafa ekki handföng áfram á skápunum heldur hnúða og sparslaði bara í götin. Ég fann hvergi handföng eða hnúða sem mig langaði í svo ég spreyjaði bara gömul tréhandföng og hnúða sem ég átti. Ég keypti málningu fyrir sirka 15 þúsund en notaði ekki nema brot af henni, svo mögulega mála ég bara innréttinguna heima líka ef ég fæ samþykki frá bóndanum.“

Margrét segir að kostnaðurinn við verkefnið hafi í raun verið undir fimm þúsund krónur.

„Ég er ótrúlega ánægð með þessa breytingu og það hefur birt heilmikið til í bústaðnum sem er frekar dimmur,“ segir hún.

Aðspurð hvort hún hafi ráð til þeirra sem langar að breyta til segir hún:

„Ekki hika við að mála hvað sem er. Passaðu að undirvinnan sé góð og ekki endilega nota ódýrustu málninguna. Ég mála líka mikið húsgögn og hef notað til þess Lady málningu með 1% gljáa, ég er hrifnust af mattri málningu, en eftir að hafa uppgötvað Intact 8 mæli ég 100% með henni á húsgögn og innréttingar.“