Tinna Freysdóttir er gift þriggja barna móðir með BS gráðu í ferðamálafræði og vinnur sem þjónustustjóri hjá Heimkaup.is. Hún er einnig mjög virk á Instagram og má fylgjast með henni hér.
Tinna og eiginmaður hennar, Arnór, hafa flutt óvenju oft en Tinna segir þau hafa fundið framtíðarhúsnæði sitt, allavega í bili.
„Við fluttum níu sinnum á fimm árum og keyptum okkur þrisvar íbúð á þremur árum. En við erum loksins komin í íbúð sem er nógu stór fyrir okkur öll og við erum búin að gera hana ótrúlega fína,“ segir Tinna í færslu á Fagurkerar.is, sem hún gaf DV góðfúslegt leyfi til að deila áfram með lesendum.
Tinna segir að íbúðin hafi uppfyllt allar sínar kröfur.
„Hún er á jarðhæð og með pall. Það er gluggi inni á baði sem er algjör plús, höfðum aldrei búið áður í íbúð með glugga inni á baði. Það varð að vera möguleiki að byggja „kisuparadís“ svo kettirnir kæmust inn og út. Og að lokum fjögur svefnherbergi sem var svona aðalatriðið. Því við nenntum ekki að flytja aftur næstu árin og vissum að okkur langaði að eignast barn númer þrjú. Ef ég væri að gera þessar kröfur í dag þá myndi ein krafan vera tvö baðherbergi. Ég meina, það er ekki hægt að fara í sturtu án þess að einhver þurfi að pissa eða kúka!“
Tinna og Arnór hafa gert ýmislegt í íbúðinni eftir að þau fengu hana afhenta.
„Við höfum sett nýjar flísar á gólfið í þvottahúsinu, gerðum baðherbergið fokhelt og græjuðum það frá a til ö, létum mála eldhúsið, gluggakisturnar, gluggakarmana, tvo skápa og útidyrahurðina, allt hvítt. Skiptum út flísunum í anddyrinu. Létum setja upp vegg og hurð í stofunni til að græja fjórða svefnherbergið. Máluðum allt þegar við fluttum inn og nýjasta verkefnið okkar var geymslan, en það voru engar hillur í geymslunni og hún var bókstaflega á hvolfi. Og alls konar meira „dúllerí,““ segir Tinna.
Sjáðu myndirnar hér að neðan.
Tinna og Arnór þurftu að gera baðherbergið aftur fokheld síðan færslan var upphaflega birt. Það má sjá allt um ferlið í highlighs á Instagram.
