Katrín Jakobsdóttir forsætisráðherra segist stundum ekki skilja hvernig eiginmaður og börn hennar nenna að vera með henni. Hún segir frá þessu í viðtali við Sölva Tryggvason í hlaðvarpsþætti Sölva.

Katrín segir að sér finnist stundum gott að hafa formlega grímu á sér eftir að hún varð forsætisráðherra. Hún segir að þessi gríma hjálpi sér að taka gagnrýni ekki persónulega.

,,Mér finnst að sumu leyti ágætt að vera aðeins formlegri, formlegheitin eru líka svona smá vörn, og ná að aðskilja mann frá persónunni sem maður er að einhverju leyti er svolítið gott að hafa stundum þessa formlegu grímu á sér,“ segir Katrín.

Hún viðurkennir að hún kíki stundum í kommentakerfin og það komi fyrir að eiginmaður hennar, Gunnar Örn Sigvaldsson, þurfi að hafa vit fyrir henni þegar kemur að utanaðkomandi gagnrýni.

Í þættinum viðurkennir hún jafnframt að fjölskyldan verði stundum út undan vegna vinnuálags.

„Ég skil eiginlega hvorki börnin né manninn minn að nenna að vera með mér,“ segir Katrín og hlær.

„Þetta er óendanlega oft svo skrýtið. Það eru oft einhver mál sem kalla á ofboðslega mörg símtöl. Þetta geta verið algjör smámál en samt ofboðslega mikil japl og svona í kringum það. Það er yfirleitt alltaf þannig að um leið og maður fer í frí gerist eitthvað sem kallar á þetta.“

Í viðtalinu ræðir Katrín um skrýtnustu augnablikin í Covid faraldrinum, ástina á Liverpool, samstarfið við Bjarna Ben og margt fleira.

Horfðu á þáttinn hér að neðan.

https://www.youtube.com/watch?v=tNNPmwsuri4&t=329s