Leikskólaliðinn Berglind Sigurðardóttir framkvæmdi tilraun með börnunum í leikskólanum Austurkór. Tilraunin gekk út á að skoða áhrif handþvottar.
Börnin notuðu brauðsneiðar til að kanna áhrifin. Brauðsneiðarnar voru ýmist snertar með hreinum eða óhreinum höndum, iPad og krakkatásum.
Það sést greinilega á myndunum hversu miklu máli það skiptir að þvo sér um hendur. Berglind deildi myndunum á Facebook og gaf DV góðfúslegt leyfi til að deila áfram með lesendum.
„Ef einhver efast um áhrif handþvottar þá vil ég sýna ykkur tilraun sem við krakkarnir á leikskólanum Austurkór gerðum. Og þvoið ykkur svo um hendurnar og hananú!“ Skrifaði hún með myndunum.
Berglind segir að niðurstöður tilraunarinnar hafi skilað sér til krakkana.
„Ég held að allir hafi séð hvað það er mikilvægt að þvo sér með sápu,“ segir hún.
