Kona í brúðarkjól kom inn með látum og krafðist þess að unnusti sinn, sem er starfsmaður Target, myndi giftast henni „hér og nú“ annars væri samband þeirra búið.
Atvikið náðist á myndband sem má sjá neðar í greininni. TikTok notandinn @boymom_ashley deildi myndbandinu.
Brúðurin mætti í verslunina ásamt presti og brúðarmey.
„Þú baðst mín fyrir tveimur árum og það er kominn tími til að gera þetta eða bara hætta þessu öllu saman,“ sagði konan við unnusta sinn, sem leið bersýnilega mjög óþægilega.
Þegar brúðurin tók eftir því að hún væri komin með áhorfendur heilsaði hún þeim og sagðist „bara loksins vera að láta hann skuldbinda sig.“
„Við ætlum að gifta okkur núna eða þetta er búið,“ sagði hún. Unnustinn spurði hvort þau geti talað um þetta, hún játaði og sagði að þau gætu gert það úti. Hann spurði á leiðinni út úr versluninni: „Hefði ekki einhver getað látið mig vita?“
@boymom_ashleyThe best part of my week🤣 part 2 watched this woman hunt her man down that works at target !! ##target##bridzilla##lasvegas##fyp##fypシ♬ original sound – Ashley
Myndbandið hefur vakið mikla athygli á TikTok og Reddit. Einnig hafa nokkrir fjölmiðlar vestanhafs fjallað um málið.
Við nánari athugun kemur í ljós að um sé að ræða sviðsett atriði. Það kemur ekki fram í umfjöllun News.au eða The Sun, en glöggir netverjar hafa áttað sig á að atriðið hafi verið sviðsett af konu sem kallar sig „The Anna Show“ á Facebook. Hún hefur sjálf ekki deilt myndbandi af hrekknum en aðdáendur hennar bíða spenntir.
