Gunnar Smári Egilsson, fjölmiðlamaður og einn stofnanda Sósíalistaflokksins, segist fagna tilkomu Ísflix Ingva Hrafns Jónsson, þó ekki í hefðbundnum skilningi. Hann segist hafa notað þætti hans á ÍNN sem nokkurs konar Grýlu.
„Þessu fagna ég. Ingvi Hrafn hefur nefnilega aðstoðað mig við barnauppeldið. Þegar Sóley var lítil og þráaðist við að fara að sofa, tannbursta sig eða gera það sem henni bar dugði mér að segja: Viltu að ég kveiki á Ingva Hrafni? Nei ekki hann, hrópaði barnið, burstaði tennurnar, stökk upp í rúm, breiddi ofan á sig og sagðist tilbúið í sögu, helst Bangsímon, kaflann um sporin. Vonandi nýtist þetta Ísflix til að koma afabörnunum í bólið í framtíðinni,“ lýsir Gunnar Smári.
Vísir greindi frá því fyrr í dag að Ingvi Hrafn hygðist koma á fót nýrri efnisveitu þar sem „borgaralegt“ efni verður fyrirferðarmikið. Ingvi nefnir sem dæmi heimildarþáttaröð úr smiðju Hannesar Hólmsteins Gissurarsonar og hlaðvarp á vegum ungra Sjálfstæðismanna.