Fjölmiðlamanninum Hjörvari Hafliðasyni var sagt upp störfum hjá Sýn í síðustu viku og kom það mörgum á óvart. Hins vegar kom það ýmsum starfsmönnum fjölmiðlafyrirtækisins ekkert sérstaklega í opna skjöldu vegna styrjar sem hefur staðið um hlaðvarpsþátt Hjörvars, Dr. Football. Samkvæmt áreiðanlegum heimildum DV var þátturinn þyrnir í augum yfirmanna Sýnar, þótt Hjörvar segist ekki kannast við það í samtali við blaðamann. Ástæðan fyrir því að Dr. Football er svo umdeildur er sú að hann var tekinn upp í stúdíói Sýnar, þótt hann væri á einkavegum Hjörvars og félaga, að sögn heimildarmanna DV. Samkvæmt heimildum DV eru miklar tekjur af Dr. Football, sem fjallar eingöngu um knattspyrnu eins og nafnið gefur til kynna, en Sýn missti nýverið enska boltann yfir til Símans.