Sara Mjöll Magnúsdóttir er ungur og upprennandi djasspíanóleikari og tónskáld sem hefur verið áberandi í djasstónlistarsenu Reykjavíkur undanfarin misseri. Hún hefur komið fram víða um borgina sem og á hátíðum svo sem Jazzhátíð Reykjavíkur og Jazzhátíð Austurlands. Hún hefur einnig starfað sem píanókennari við skólann Tónsali síðastliðin ár. Í haust leggur Sara Mjöll land undir fót og hefur nám í djasspíanóleik við William Paterson University í New Jersey í Bandaríkjunum.

Hvar líður þér best?
Á sólarströnd eða uppi í sófanum hjá mömmu og pabba.

Hvað óttastu mest?
Að allur heimurinn breytist í frauðplast.

Hvert er þitt mesta afrek?
Að halda áfram þegar á móti blés.

Furðulegasta starf sem þú hefur tekið að þér?
Líklega þegar ég spilaði djass fyrir fáklætt fólk úti í fimm stiga frosti í Nauthólsvík í janúar. Giggið var bara 20 mínútur en seinustu 5 mínúturnar, þegar fingurnir höfðu breyst í ísmola, voru þær erfiðustu sem ég hef upplifað við píanóið.

Hver væri titillinn á ævisögu þinni?
Konan sem elskaði jazz og hataði frauðplast.

Hvernig væri bjórinn Sara Mjöll?
Hann væri bara Einstök White Ale með nýjum miða, má það ekki?

Besta ráð sem þú hefur fengið?
Ég trúi því að Katrín Tanja crossfit-drottning hafi verið að tala beint til mín þegar ég heyrði hana segja í viðtali: „ef maður gerir það sem maður elskar og gefur allt í það, þá mun allt fara vel að lokum“. Þetta varð ákveðin mantra fyrir mig enda alveg satt.

Hvert er leiðinlegasta húsverkið?
Að þrífa niðurfallið á sturtunni.

Besta bíómynd allra tíma?
Stella í orlofi.

Hvaða hæfileika myndir þú vilja búa yfir?
Ég dáist að fólki sem hefur hæfileikann til að draga það besta fram í öllum.

Hver er mesta áhætta sem þú hefur tekið?
Ætli það sé ekki bara að hætta í vinnunni, flytja úr samfélagi þar sem ég fæ nóg að gera og flytja til annars lands þar sem ég þekki engann og elta drauminn. Annars keypti ég líka verðbréf árið 2007 þegar ég var 13 ára. Good times.

Hvaða frasi eða orð fer mest í taugarnar á þér?
„Þetta gerði daginn minn“. Ljótasti beinþýddi frasi sem til er.

Hvaða getur þú sjaldnast staðist eða ert góð í að réttlæta að veita þér?
Þegar einhver býður mér köku eða eitthvert bakkelsi.

Hvað er á döfinni hjá þér?
Á döfinni er að undirbúa flutninga til Bandaríkjanna, spila nokkur gigg, vonandi fara í eina útilegu og hafa það gott með vinum og vandamönnum.